Имконияти ноҳияи Данғара барои рушди намудҳои сайёҳии аграрӣ, шикор ва гастрономию экологӣ мувофиқ мебошад

Декабрь 16, 2020 12:40

ДУШАНБЕ, 16.12.2020. /АМИТ «Ховар»/. Имконияти ноҳияи  Данғара барои рушди намудҳои сайёҳии аграрӣ, шикор ва гастрономию экологӣ хеле мувофиқ буда, аз рӯи таҳлилҳо сайёҳон асосан мавсими баҳору Наврӯз аз талу теппаҳои лолазор,   гиёҳҳои худрӯю шифобахши минтақа, маънунгоҳи “Хуталон”, Маҷмааи фарҳангии “Хуррамшаҳр”, “Қасри фарҳанг”, Маҷмааи ситорашиносии “Санглох” –и ноҳияи Данғара боздид намуда, бо  нақшу нигор, гаҷкорӣ ва ҳунари кандакории миллати сарбаланди тоҷик аз наздик шинос мешаванд.

Ин матлабро Ректори Донишгоҳи давлатии Данғара Нуралӣ Шоҳиён  дар ҷараёни баргузории машварати омӯзишӣ оид ба малакаи идоракунии  сайёҳии кишоварзӣ, ки дар Донишгоҳи мазкур сурат гирифт, зикр намуд.

Тавре ёвари ректор ва мудири бахши  робита бо фазои иттилоотии Донишгоҳи давлатии Данғара Муҳаммад  Шораҳимзода ба АМИТ «Ховар» хабар дод, дар  Донишгоҳи давлатии Данғара  ихтисосҳои соҳаи сайёҳӣ, аз қабили зебосозии шаҳр, дизайни экспазитсионӣ, сохтмони деҳот ва ободонии муҳит, бофандагии бадеӣ-моделисозии костюм, дизайн, саёҳат ва меҳмондорӣ амал менамоянд, ки ба омода намудани мухассисони рақобатпазир ва соҳавӣ равона гардидаанд. Бо мақсади рушд додани соҳаи сайёҳии аграрӣ дар ноҳия донишҷӯён ба таҷрибаомӯзӣ дар хоҷагиҳои деҳқонӣ ҷалб гардида, ҳамкории донишгоҳ бо Кумитаи рушди сайёҳии назди Ҳукумати Ҷумҳурии Тоҷикистон ва хоҷагиҳои деҳқонӣ зиёд мегардад.

Зимни машварати омӯзишӣ зикр шуд, ки Тоҷикистон мамлакати  офтобӣ  ва дорои табиати зебову нотакрор, қуллаҳои баланду сарбафалаккашида ва ёдгориҳои таърихию бостонӣ буда, қалби садҳо нафар сайёҳони хориҷиро тасхир намудааст. Ин аст, ки боздиди сайёҳони хориҷӣ аз Тоҷикистон беш аз пеш афзоиш меёбад.

Раиси Кумитаи рушди сайёҳии назди Ҳукумати Ҷумҳурии Тоҷикистон Тоҷиддин Ҷуразода иброз дошт, ки тӯли солҳои охир Ҳукумати Ҷумҳурии Тоҷикистон ба инкишофи соҳаи туризм таваҷҷуҳи махсус зоҳир менамояд. Қабули  Қонуни Ҷумҳурии Тоҷикистон «Дар бораи туризм», таҳияи Стратегияи рушди сайёӣ дар Ҷумҳурии Тоҷикистон барои давраи то соли 2030 бо Қарори Ҳукумати Ҷумҳурии Тоҷикистон аз 1 августи соли 2018,  Барномаи давлатии рушди туризм ва дигар барномаҳои муҳими давлатӣ аз сиёсати пешгирифтаи Ҳукумати Ҷумҳурии Тоҷикистон ҷиҳати пешрафти соҳа шаҳодат медиҳанд.

Ҷалби маблағҳои ғайрибуҷетӣ ба роҳандозии инфрасохтори сайёҳӣ, омода намудани мутахассисони  соҳаи гардишгарӣ, сохтмони меҳмонхонаву осоишгоҳҳои ҷавобгӯ ба талаботи замони муосир барои инкишофи туризми истироҳативу табобатӣ заминаи мусоид фароҳам овард. Имрӯз сайёҳони беш аз 81 кишвар метавонанд озодона дар Фурудгоҳи байналмилалии Душанбе раводиди Тоҷикистон гиранд.

Гурӯҳи кории кумита иборат аз мутахассисону коршиносон дар қаламрави мамлакат самтҳои афзалиятноки рушди соҳаро таҳлил карда, баҳри ба талаботи муосир мутобиқ намудани  мавзеъҳои сайёҳӣ талош доранд. Ба мавзеи туристӣ табдил додани ҷойҳои таърихиву фарҳангӣ ва дороиҳои табиии Тоҷикистон барои ҷалби бештари ҷаҳонгардон, таъсиси ҷойҳои нави корӣ, ғанӣ гардондани буҷети мамлакат заминаи мусоид фароҳам меорад.

Ёдовар мешавем, ки дар машварати мазкур мудирони шуъба (бахшҳо), сармутахассисон, роҳбарони марказҳои ҳунармандии Донишгоҳи давлатии Данғара, мутахассисони ошхонаҳо, меҳмонхонаҳо ва намояндагони зиёда аз 40 хоҷагии деҳқонии ноҳия ширкат варзиданд. Ба шунавандагони курси мазкур  аз ҷониби олимону коршиносон, мутахассисону омӯзгорони ботаҷриба доир ба мавзуъҳои принсипҳои идоракунии агротуризм, мафҳуми агротуризм — ҷалб намудани оила ва ҷомеа, банақшагирии тиҷорат ва идоракунии молиявӣ, асосҳои идоракунии хавфҳо, бехатарии сайёҳон, меҳмоннавозӣ ва таҷрибаи пешқадам машғулият гузаронида шуд.

Дар хатми машғулият иштирокчиёнро Раиси кумитаи рушди сайёҳии назди Ҳукумати Ҷумҳурии Тоҷикистон Тоҷиддин Ҷӯразода ва Ректори Донишгоҳи давлатии Данғара Нуралӣ Шоҳиён  бо сертификат қадрдонӣ намуданд.

Дар идомаи сафи корӣ ба Донишгоҳи давлатии Данғара бо иштироки Раиси Кумитаи рушди сайёҳии назди Ҳукумати Ҷумҳурии Тоҷикистон Тоҷиддин Ҷӯразода ва Ректори Донишгоҳи давлатии Данғара профессор Нуралӣ Шоҳиён бо донишҷӯёни бахши сайёҳӣ суҳбату вохӯрии озод  доир гардид.

Дар ин замина байни Донишгоҳи давлатии  Данғара ва ташкилоти ҷамъиятии “Ассотсиатсияи Шӯрои рушди туризм”, ташкилоти ҷамъиятии “Шӯрои Зарафшон оид ба туризм” Меморандум оид ба ҳамкории судманд дар раванди татбиқи дастовардҳои илмӣ, лоиҳаҳои инноватсионӣ ва лоиҳаҳои инвеститсионӣ ба имзо расид.

Хотиррасон мешавем, ки машварати омӯзишӣ оид ба малакаи идоракунии  сайёҳии кишоварзӣ,  ки аз 12 то 15 декабр дар Донишгоҳи давлатии Данғара  дар ҳамкорӣ бо Кумитаи рушди сайёҳии назди Ҳукумати Ҷумҳурии Тоҷикистон, ташкилоти ҷамъиятии “Ассотсиатсияи Шӯрои рушди туризм” ва ташкилоти ҷамъиятии “Ассотсиатсияи Шӯрои туризми Зарафшон” бахшида ба Солҳои рушди деҳот, сайёҳӣ ва ҳунарҳои мардумӣ  сурат гирифт, тавонист доираи васеи матахассисони соҳаро ба ҳам  ва дар самти табодули таҷриба заминаи мусоид фароҳам оварад.

Декабрь 16, 2020 12:40

Хабарҳои дигари ин бахш

Соли 2023 ба буҷети шаҳри Гулистон аз ҳисоби хизматрасонии сайёҳӣ ва табобатӣ зиёда аз 40 миллион сомонӣ ворид шуд
«НАВРӮЗ — МЕРОСИ ФАРҲАНГИЮ ҶАҲОНГАРДӢ». Табиати зебои Тоҷикистон дили меҳмонони хориҷиро тасхир намуд
Ба шарафи Наврӯзи бостонӣ дар Кумитаи рушди сайёҳии Тоҷикистон ҳамоиши тантанавӣ доир шуд
Коршиносони олмонӣ дар ҷашни наврӯзии Донишгоҳи байналмилалии сайёҳӣ ва соҳибкории Тоҷикистон иштирок намуданд
Дар шаҳри Душанбе Фестивали байналмилалии «Наврӯз-мероси фарҳангию ҷаҳонгардӣ» баргузор гардид
Дар Боғи Ирами шаҳри Душанбе Фестивали байналмилалии «Наврӯз-мероси фарҳангию ҷаҳонгардӣ» бо намоиши ҳунарҳои мардумӣ доир гардид
Дар Намоишгоҳи байналмилалии сайёҳӣ ва меҳмоннавозии Москва имконоти сайёҳии Тоҷикистон муаррифӣ гардид
Масъалаи тақвияти ҳамкории Тоҷикистон ва Ҷопон дар соҳаи сайёҳӣ мавриди баррасӣ қарор гирифт
Ҷаласаи нуҳуми Шурои ҳамоҳангсозии миллӣ оид ба рушди соҳаи сайёҳӣ дар назди Ҳукумати Ҷумҳурии Тоҷикистон баргузор гардид
ФОРУМИ B5+1. Ҳамгироии иқтисодии минтақавии Осиёи Марказӣ тавассути муколамаи давлатӣ ва бахши хусусӣ тақвият меёбад
Дар шаҳраки бостонии Саразм майдони пазироӣ, дарвозаи рамзӣ ва терминали логистикӣ сохта мешавад
РӮЗИ МАТБУОТИ ТОҶИК. Кумитаи рушди сайёҳии Тоҷикистон заҳмати як зумра рӯзноманигоронро қадрдонӣ намуд