Кормандони милитсия дар Ҳисор якчанд хонандаро, ки ба ҷои дарсхонӣ ба бозиҳои компютерӣ машғул буданд, боздошт намуданд
ДУШАНБЕ, 09.12.2020 /АМИТ «Ховар»/. Кормандони милитсия дар интернет-кафеҳо ва марказҳои бозиҳои компютерии шаҳри Ҳисор 10 нафар ноболиғ ва 16 нафар ҷавонон, аз ҷумла хонандагони муассисаҳои таҳсилоти миёнаи умумиро, ки дар вақту соати дарсӣ ба ҳар гуна бозиҳои компютерии дорои хусусияти зӯроварӣ машғул буданд, боздошт намуданд. Дар ин бора аз Вазорати корҳои дохилии Ҷумҳурии Тоҷикистон ба АМИТ “Ховар” хабар доданд.
Ин чорабинии мақсадноки пешгирикунанда бо мақсади ошкору пешгирӣ намудани ҳолатҳои номатлуб миёни ноболиғону ҷавонон аз ҷониби кормандони шуъбаи ҷавонони Раёсати огоҳонӣ ва пешгирии ҳуқуқвайронкунии ноболиғону ҷавонони (РОПҲНҶ) Вазорати корҳои дохилии ҷумҳурӣ гузаронида шуд.
Тавре маълум гардид, аксари ин наврасону ҷавонони зикршуда бо баҳонаи ба мактаб рафтан аз беназоративу бемасъулиятии волидон ва маъмурияти муассисаҳои таълимӣ истифода намуда, вақти худро дар марказҳои компютерӣ ба шуғлҳои беҳудаи зараровар мегузаронидаанд.
Ин тадбирандешӣ бо мақсади таъмини иҷрои талаботи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» амалӣ карда шуда, ҳолатҳои зиёди вайрон намудани талаботи ин қонун аз тарафи волидони ноболиғонро ошкор намуд. Аён гардид, ки ноболиғони зиёд рӯзона бе назорат дар кӯчаву хиёбонҳо гаштугузор намуда, аксаран ба корҳои зараровар, хусусан ба ҳар гуна бозиҳои компютерӣ, ки сабаби ҷой гирифтани рафтору кирдорҳои бадахлоқона дар зеҳну тафаккури насли наврас мегарданд, машғул мешаванд. Дар бештари маврид маҳз беҳудагардиву дур аз назорати падару модар будани ноболиғон боиси ба ҳар гуна роҳҳои хато рафтани онҳо мегардад.
Нисбат ба волидони он ноболиғону ҷавононе, ки зимни ин чорабинии мақсадноки пешгирикунанда боздошту ба шуъбаи милитсия дастрас гардиданд, мувофиқи талаботи қонунгузорӣ бо моддаи 90-и Кодекси ҳуқуқвайронкунии маъмурии Ҷумҳурии Тоҷикистон ва нисбат ба моликони ин гуна интернет-кафеҳо ва марказҳои бозиҳои компютерӣ, ки дидаву дониста ноболиғону ҷавонони мактабхонро дар вақту соати дарсӣ ба иншооти худ роҳ додаанд, мувофиқи моддаи 464 иловаи 1-и Кодекси мазкур тадбирҳои маъмурӣ андешида шуданд.
Муовини Сарвазири Тоҷикистон бо вазъи соҳаи кишоварзии шаҳри Истаравшан шинос шуд
Беш аз 700 соҳибкори Бадахшон бо дастгоҳи назоратӣ-хазинавӣ таъмин мешавад
«ПАЁМ — РОҲНАМО БАРОИ ИҶРОИ ҲАДАФҲОИ ШОИСТА». Таҳти ин унвон ҳамоиши илмӣ-назариявӣ баргузор шуд
Дар мақомоти Ваколатдор бахшида ба 32-солагии таъсиси Қувваҳои Мусаллаҳ ҳамоиши идона доир гардид
БӮЙИ БАҲОР МЕРАСАД. Тоҷикистониёнро дар ин фасл чӣ гуна ҳаво интизор аст?
Имрӯз дар шаҳри Душанбе ҳаво то 17 дараҷа гарм мешавад
Дар қисми низомӣ дар вилояти Суғд Рӯзи дарҳои кушод доир гардид
Маркази ҷумҳуриявии илмии саратоншиносӣ бо дастгоҳи муосири ташхиси рентгении рақамӣ (Digital x-ray) таъмин гардид
Таҳаввулоти рақамӣ: чӣ тавр технологияҳои рақамӣ ҳаётро тағйир медиҳанд
Имрӯз дар Тоҷикистон ҳавои тағйирёбандаи бебориш пешгӯӣ мешавад
«БА ДАВЛАТУ МИЛЛАТАМ СОДИҚОНА ХИЗМАТ МЕКУНАМ!». Дар Душанбе Фестивали дӯстии афсарону сарбозон ва ҷавонони синни даъватӣ баргузор мегардад
«КАДБОНУИ БЕҲТАРИН». Дар ноҳияи Бобоҷон Ғафуров даври ноҳиявии ин озмун баргузор гардид
