Кумитаи ҳолатҳои фавқулода ва мудофиаи гражданӣ аз хатари тармафароӣ ҳушдор медиҳад

ДУШАНБЕ, 03.12.2020 /АМИТ «Ховар»/. Дар робита ба ҳавои ноустувори мамлакат Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон шаҳрвандон ва меҳмонони мамлакатро огоҳ мекунад, ки баъзе қитъаҳои роҳҳои кӯҳии ҷумҳурӣ хатарнок боқӣ мемонанд. Дар ин бора аз маркази матбуоти  Кумитаи мазкур ба АМИТ “Ховар” хабар доданд.  

Дараҷаи баланди хатари тармафароӣ дар қитъаҳои роҳи  «Душанбе — Хуҷанд», «Душанбе — Рашт», «Душанбе — Сангвор», «Душанбе — Лахш», «Кӯлоб — Дарвоз», «Ванҷ — Хоруғ», «Хоруғ — Ишкошим» ва «Хоруғ — Мурғоб» боқӣ мондааст.

Кумитаи ҳолатҳои фавқулода ва мудофиаи гражданӣ  сокинонро ҳушдор медиҳад, ки аз сафар ва рафтан ба ҷойҳое, ки хатари тармафароӣ доранд, худдорӣ кунанд. Ронандагон ҳангоми ҳаракат дар минтақаҳои кӯҳӣ ё қитъаҳои зери тарма қарордошта бояд фосилаи муқарраршудаи ҳаракатро миёни  нақлиёт қатъиян риоя кунанд.

Акс аз бойгонӣ