Масъулин бо фаъолияти шабонаи як зумра беморхонаҳои шаҳру ноҳияҳои тобеи ҷумҳурӣ шинос шуданд

ДУШАНБЕ, 14.12.2020 /АМИТ «Ховар»/. Бо мақсади шиносоӣ бо фаъолияти шабонаи муассисаҳои тандурустӣ муовинони Вазири тандурустӣ ва ҳифзи иҷтимоии аҳолии Ҷумҳурии Тоҷикистон ба якчанд шаҳру ноҳияҳои ҷумҳурӣ сафар намуда, бо фаъолияти муассисаҳои тандурустӣ шинос шуданд. Аз ҷумла, муовини якуми вазир Ғафур Муҳсинзода аз Беморхонаи марказии шаҳри Ҳисор, Зулфия Абдусаматзода аз Беморхонаи марказии ноҳияи Рӯдакӣ, Шодихон Ҷамшед аз Беморхонаи Марказии  ноҳияи Шаҳринав ва Самариддин Ализода аз Беморхонаи марказии шаҳри Турсунзода боздид намуданд.

Тавре аз маркази матбуоти Вазорати тандурустӣ ва ҳифзи иҷтимоии аҳолии мамлакат ба АМИТ “Ховар” хабар доданд, муовинони вазир зимни боздид аз фаъолияти  шуъбаҳои беморхонаҳои шаҳру ноҳияҳо, ҳамзамон бо бемороне, ки дар муассисаҳои тандурустӣ ба табобат фаро гирифта шудаанд, суҳбат намуданд.

Ҳадаф аз иқдоми  мазкур, пеш аз ҳама, шиносоӣ бо вазъи воқеии муассисаҳои тандурустӣ ва ҷараёни хизматрасонии табибон дар шабонгоҳ, омодагии онҳо барои муътадил гузаронидани фасли зимистон, вохӯрӣ бо беморон ва дигар масъалаҳои ҷойдошта мебошад.