Тоҷикистон ба даҳгонаи роҳҳои ҳавоии барои россиягиҳо бештар маъмул дар соли 2020 ворид шуд

ДУШАНБЕ, 21.12.2020 /АМИТ «Ховар»/. Тибқи як пажӯҳиши хадамоти сайёҳӣ ва сафарҳои Tutu.ru, Тоҷикистон соли 2020 ба даҳгонаи роҳҳои  ҳавоии барои  россиягиҳо маъмул ворид шуд. Инчунин ба ин даҳгона Арманистон, Озарбойҷон, Беларус, Германия, Қазоқистон, Қирғизистон, Молдова, Туркия, Ӯзбекистон шомиланд, хабар медиҳад АМИТ «Ховар» бо истинод ба ТАСС.

«Талабот ба парвозҳо, ҳатто ба самтҳои маъмултарин имсол хеле коҳиш ёфт. Аз раддабандии  10 самти маъмул  талабот ба парвозҳо ба Туркия камтар коҳиш ёфт. Ин кишвар қабули русҳоро аз моҳи август шурӯъ кард ва аввалин алтернатива барои истироҳатгоҳҳои баҳрии ватанӣ шуд. Аммо, ба ҳар ҳол, нисбат ба соли гузашта  русҳо 40-45% камтар ба Туркия рафтаанд», — зикр шудааст  дар Tutu.ru.

Дар ҷумлаи самтҳои туркӣ Истанбул ва Анталия маъруфтар шудаанд. «Дар  ин самтҳо ҳиссаи сайёҳони мустақил, ки онҳо ҷалб мекунанд, се маротиба зиёд шудааст», — зикр мекунанд дар Tutu.ru.

Дар айни ҳол, арзиши миёнаи чиптаи ҳавопаймо ба хориҷи наздик (як тараф) то 6%  афзуд ва 11,7 ҳазор рублро ташкил медиҳад, ба Аврупо — 9% ва14,8 ҳазор рубл.

Россия бар асари пандемия дар фасли баҳор парвозҳои мунтазами мусофиронро ба дигар кишварҳо қатъ кард. Аз тобистон парвозҳо ба як қатор кишварҳо қисман аз сар гирифта шуданд: Беларус, Қазоқистон, Қирғизистон, Кореяи Ҷанубӣ, Миср, АМА, Туркия, Британияи Кабир, Швейтсария, Танзания, Сербия, Япония, Эфиопия, Малдив, Ҷазираҳои Сейшел ва Куба. Инчунин баъзе ширкатҳои ҳавопаймоии Россия ва хориҷӣ ба истилоҳ парвозҳои боркашонӣ-мусофиркашонӣ анҷом медиҳанд, ки пеш аз ҳама, барои интиқоли молҳои гуногун пешбинӣ шудаанд, аммо интиқоли баъзе категорияҳои мусофирон сурат мегирад.

                                                         АКС аз сомонаи  altaex.ru