Агентии обуҳавошиносӣ: Шабонарӯзи наздик дар бештари ноҳияҳои ҷумҳурӣ фаромадани туман ва резиши қирав боқӣ мемонад

ДУШАНБЕ, 5.1.2021 /АМИТ «Ховар»/. Шабонарӯзи наздик дар бештари ноҳияҳои ҷумҳурӣ фаромадани туман ва резиши қирав боқӣ мемонад. 8-9 январ бо сабаби софшавии ҳаво шабона дар бештари ноҳияҳои кӯҳии ҷумҳурӣ то 10-15 дараҷа хунукӣ ва дар баъзе ноҳияҳо то 17-22 дараҷа хунукӣ дар назар аст. Дар ноҳияҳои шарқии Вилояти Мухтори Кӯҳистони Бадахшон ҳаво 25-30 ва дар баъзе минтақаҳо то 33-38 дараҷа хунукӣ пешгӯӣ мешавад. Дар ин бора аз Агентии обуҳавошиносии  Кумитаи ҳифзи муҳити зисти назди Ҳукумати Ҷумҳурии Тоҷикистон ба АМИТ «Ховар» хабар доданд.

Тибқи иттилои манбаъ, аз 6 то 9 январ  дар вилояти Хатлон ҳаво тағйирёбанда шуда, эҳтимоли бориши нисбатан сусти марҳилавӣ дар назар аст. Дар баъзе ноҳияҳо туман мефарояд. Шамол аз самти ғарб бо гузариш ба шарқ бо суръати 3-8 метр дар як сония мевазад. Ҳаво дар водиҳо шабона 5-10 ва рӯзона 0-5 дараҷа хунук мешавад. Танҳо 9 январ ҳарорати ҳаво баланд шуда, то 0+5 дараҷа гарм мешавад.  Дар доманакӯҳҳо ҳаво шабона 4-9 дараҷа хунук мешавад.

Дар вилояти Суғд ҳавои тағйирёбандаи бебориш пешгӯӣ шуда, дар баъзе ноҳияҳо туман мефарояд. Шамол аз самти ғарб бо гузариш ба шарқ бо суръати 3-8 метр дар як сония мевазад. Ҳаво дар водиҳо шабона 3-8 дараҷа хунук ва рӯзона аз 3 дараҷа хунук то 2 дараҷа гарм мешавад. Дар ноҳияҳои кӯҳӣ шабона 12-17, рӯзона 1-6 дараҷа сард мешавад.

Дар шаҳру ноҳияҳои тобеи марказ ҳавои тағйирёбанда шуда, эҳтимоли бориши нисбатан сусти марҳилавӣ дар назар аст ва дар баъзе ноҳияҳо туман мефарояд. Шамол аз самти ғарб бо гузариш ба шарқ бо суръати 3-8 метр дар як сония мевазад. Ҳаво дар водиҳо шабона 4-9 дараҷа хунук ва рӯзона  аз 2 дараҷа хунук то 3 дараҷа гарм мешавад. 9 январ ҳарорат  баланд шуда, то 1+6 дараҷа гарм мешавад. Дар ноҳияҳои кӯҳӣ шабона ҳарорат тағйир ёфта,  аз 10-15 то 16-21 ва рӯзона аз 0-5  то  5-10 дараҷа сард  мешавад.

Дар вилояти Мухтори Кӯҳистони Бадахшон ҳавои тағйирёбанда дар назар буда, эҳтимоли бориши сусти марҳилавӣ пешгӯӣ мешавад. Шамол аз самти ғарб бо гузариш ба шарқ бо суръати 3-8 метр дар як сония мевазад. Ҳаво дар ғарби вилоят шабона тағйир ёфта, аз 12-17 то 17-22 дараҷа хунук ва рӯзона 2-7 дараҷа хунук мешавад. Дар шарқи вилоят ҳаво шабона  25-30, дар баъзе минтақаҳо то 33-38 дараҷа хунук мешавад. Дар мавзеи Булункӯл то 48-50 дараҷа сардӣ дар назар аст. Рӯзона ҳарорати ҳаво тағйир ёфта, аз 12-17 то 17-22 дараҷа сард мешавад.