Ба муассисаҳои иҷтимоии Кӯлоб 70 тонна ангишти ройгон дастрас гардид

ДУШАНБЕ, 15.01.2021. /АМИТ «Ховар»/. Тибқи супориши Ҳукумати Ҷумҳурии Тоҷикистон барои муассисаҳои иҷтимоии  шаҳри Кӯлоб 70 тонна ангишти ройгон интиқол дода шуд, ки он ба муассисаҳои таълимӣ ва тандурустии шаҳр  дастрас гардид.

Тавре аз мақомоти иҷроияи ҳокимияти давлатии шаҳри Кӯлоб ба АМИТ “Ховар” хабар доданд,  вазъияти баамаломадаро  ба инобат гирифта, барои сарфа  намудани нерӯи барқ  синфхонаҳо, утоқҳои корӣ, дармонгоҳ, бунгоҳ ва беморхонаҳои шаҳру деҳот дар таъмини гармӣ аз маводи сӯхт- ангиштсанг истифода  мебаранд.

Аксари корхонаҳо ва марказҳои хизматрасонии шаҳри Кӯлоб  бо мақсади сарфа намудани нерӯи барқ  дар фаъолияти худ аз ангишт истифода мебаранд.

Мақомоти иҷроияи ҳокимияти давлатии шаҳри Кӯлоб минбаъд низ  дар ҳолати ба миён омадани зарурат  муассисаҳои таълимӣ ва тандурустии шаҳру деҳоти шаҳрро  иловатан бо ангишт таъмин  менамоянд.