Британияи Кабир барои эмгузаронӣ дар доираи COVAX AMC 1 млрд доллар ҷамъ овард. Тоҷикистон расман ба ин механизм шомил карда шудааст
ДУШАНБЕ, 11.01.2021 /АМИТ «Ховар»/. Британияи Кабир тавонист барои эмгузаронии зидди коронавирус дар 92 кишвари рӯ ба тараққӣ 1 млрд доллар ҷамъ оварад. Дар ин бора дар намояндагии доимии Британия дар СММ дар робита бо оғози сафари «серӯзаи маҷозии» дабири кулли созмон Антонио Гутерриш ба Британия изҳор доштанд, хабар медиҳад АМИТ «Ховар» бо истинод ба ТАСС.
«Британия то ба ҳол як миллиард доллар аз сармоягузорони байналмилалӣ ҷалб кардааст, то ба кишварҳои бештар осебпазир дар дастрасӣ ба ваксинаҳои зидди коронавирус ва манъ кардани паҳншавии пандемия кумак кунанд», — иброз намуданд дар намояндагии дипломатӣ.
Ин маблағҳо барои маблағгузории иловагии механизми COVAX равона хоҳанд шуд. «Дар ин саҳми худи кишвар дар ҳаҷми 548 миллион доллар низ шомил аст. Ин маблағ имкон медиҳад, ки имсол 92 кишвари рӯ ба тараққӣ бо 1 миллиард вояи ваксина таъмин карда шаванд”, — эзоҳ доданд дар намояндагии доимӣ.
«Табиист, ки Британияи Кабир дар якҷоягӣ бо ҳампаймонҳояш ба муносибати 75-умин солгарди таъсиси СММ барои кишварҳои осебпазир 1 миллиард вояи ваксинаи зидди коронавирусро дастрас гардонид», — зикр шудааст дар изҳороти вазири корҳои хориҷии Британияи Кабир Доминик Рааб, ки онро намояндагии доимии кишвар дар СММ интишор намудааст.
Тавре АМИТ “Ховар” қаблан хабар дода буд, Тоҷикистон расман ба рӯйхати кишварҳои дархосткунандаи ваксинаи зидди COVID-19 дар доираи COVAX шомил карда шудааст.
Кишварҳои ширкаткунандаи ин барнома метавонанд дар нимаи аввали соли 2021 ба ваксинаҳои зидди коронавирус дастрасӣ пайдо кунанд.
Вазорати тандурустӣ ва ҳифзи иҷтимоии аҳолии Тоҷикистон як гурӯҳи кории техникии иборат аз мутахассисони асосии соҳа, коршиносон ва намояндагони созмонҳои байналмилалиро барои омодагӣ ҷиҳати эмгузаронӣ бо ваксина таъсис додааст.
Гурӯҳи мақсаднок аз шумораи умумии аҳолӣ барои эмгузаронӣ муайян карда шудааст, ки 1,8 миллион нафарро ташкил медиҳад (20% шумораи умумии аҳолӣ). Ба ин гурӯҳ кормандони соҳаи тиб, маориф, шахсони аз 50-сола боло ва шахсони гирифтори бемориҳои музмини гузаранда шомил карда шудаанд.
Миқдори зарурии дору аз тариқи механизми COVAX ҳамчун кумаки башардӯстона ба кишвар дода хоҳад шуд. Барои хариди ваксинаҳо Бонки ҷаҳонӣ 3 миллион доллар ҷудо кардааст, инчунин 5 миллион доллари иловагӣ пешбинӣ шудааст.
Хотиррасон мекунем, ки механизми COVAX AMC (Advance Market Commitment) — ро СУТ муштаракан бо Эътилофи сартосарии ваксинаҳо ва иммунизатсия (GAVI) ва Эътилофи инноватсияи дар соҳаи таъмини омодагӣ зидди эпидемияҳо, ки таъсиси иқтидорҳои истеҳсолиро дастгирӣ ва доруҳоро харидорӣ мекунад, ташкил намудааст.
АКСИ: Сronista.com
«ОТАШИ ҶАШНИ САДА ОТАШИ МЕҲРИ ВАТАН АСТ». Дар Душанбе ҷашни Сада ва намоиши тухмии зироати кишоварзӣ баргузор шуд
ҲАРОРАТИ ГЛОБАЛИИ ҲАВО БА 1,5 ДАРАҶА РАСИДААСТ. Ин ба уҳдадории давлатҳо дар доираи Созишномаи Париж мухолифат мекунад
Президенти Тоҷикистон: «Кишоварзони мамлакат бояд ба масъалаи парваришу захираи тухмиҳои беҳтарин ва ниҳолҳои серҳосил таваҷҷуҳи махсус зоҳир намоянд»
Эмомалӣ Раҳмон: «Се ҷашни миллии мо – Наврӯз, Сада ва Меҳргон аз ҷониби мардуми фарҳангпарвари ҷаҳон пазируфта шудаанд»
«ОЛАМИ ГУЛДӮЗИИ ТОҶИКОН». Ин китоб мероси пурарзиши тоҷиконро ба ҷаҳониён муаррифӣ менамояд
Вобаста ба омодагӣ ба баргузории Конфронси байналмилалии сатҳи баланд оид ба Cоли байналмилалии ҳифзи пиряхҳо ҳамоиш доир шуд
ТАШАББУСИ ТОҶИКИСТОН. Созмони Милали Муттаҳид ба таҷлили Соли байналмилалии ҳифзи пиряхҳо оғоз намуд
Дар Созмони Милали Муттаҳид Соли байналмилалии ҳифзи пиряхҳо оғоз гардид
Масъуд Пизишкиён: «Дар Тоҷикистон эҳсоси ғурбат намекунам»
Эмомалӣ Раҳмон Масъуд Пизишкиёнро ба ҷашни Наврӯз даъват намуданд
НАЗАРИ КОРШИНОС. Робитаҳои Ҷумҳурии Тоҷикистон бо Ҷумҳурии Исломии Эрон бар пояи пайвандҳои таърихӣ асос ёфтаанд
САДА, ИН ПАРТАВИ ХУРШЕДИИ ИСТИҚЛОЛ АСТ! Имсол ин ҷашни бостониро дар Тоҷикистон 25-26 январ ҷашн мегиранд
