Дар Гимназияи ба номи Гёте-и шаҳри Хуҷанд лоиҳаи «Истифодаи неруи алтернативӣ» амалӣ мегардад

Январь 13, 2021 14:13

ДУШАНБЕ, 13.01.2021. /АМИТ «Ховар»/. Ду сол инҷониб дар мактаби таҳсилоти умумии ғайридавлатии «Гимназияи ба номи Гёте»-и шаҳри Хуҷанд дар самти оқилонаву самаранок истифода бурдани неруи барқ ва инчунин истифодаи манбаҳои барқароршавандаи энергия лоиҳае таҳти унвони «Истифодаи неруи алтернативӣ» ё худ «Насби системаи офтобӣ» амалӣ гардида истодааст. Дар ин замина дар доираи роҳандозии лоиҳаи зерин моҳҳои ноябр-декабри соли 2020 аз ҷониби мутахассисони ҶДММ «Технологияҳои Сабз» (Green Technologies) дар шифти бинои гимназия таҷҳизоти офтобӣ насб гардида, давоми се рӯзи ҳафтаи равон аз тарафи мутахассисони ин ширкат барои як гурӯҳ омӯзгорону шахсони мутасаддӣ ва инчунин хонандагони синфҳои 9-10-и гимназия омӯзиши техникӣ оид ба мавзӯи «Манбаҳои алтернативии неруи сабз» гузаронида шуд. Дар ин бора хабарнигори минтақавии АМИТ «Ховар» бо истинод ба дафтари матбуоти мақомоти иҷроияи ҳокимити давлатии шаҳри Хуҷанд иттилоъ медиҳад. 

Дар доираи баргузории омӯзиши техникӣ иштирокчиён бо барномаи ширкат, технологияҳову таҷҳизоти насбшуда, тарзи бадастоварӣ, истифодаи манбаҳои барқароршавандаи энергия бо бартариҳову дурнамои неруи офтобӣ шинос гардиданд. Ҳамзамон омӯзиши таҷрибавӣ оид ба насби панелҳои офтобӣ ва пайвасти қисмҳои асосии шабакаи барқии офтобӣ ва бакордарории он гузаронида шуда, дар анҷоми омӯзишҳо ба ҳозирин сертификат ва либосҳои нави корӣ супорида шуданд.

Лоиҳаи «Насби системаи неруи офтобӣ» аввалин маротиба дар миқёси ҷумҳурӣ дар ин гимназия роҳандозӣ гардида, ба ин муассисаи таълимӣ имконият медиҳад на танҳо синфхонаҳову утоқҳоро, ки бо компютеру лавҳаҳои электронӣ ва системаҳои бехатарӣ муҷаҳҳаз гаштаанд, аз хомӯшии ногаҳонии барқ ҳифз ва бо барқи доимӣ таъмин намояд, балки дар фаъолияти худ неруи сабзро васеъ истифода бурда, дар сарфаи барқ, пешбурди соҳаи неруи сабз ва равнақ додани иқтисодиёти мамлакат саҳм гузорад.

Хотиррасон мекунем, ки соли 2019 хонандагони гимназия Таҳминахон Холиқова ва Далер Дадобоев бо роҳбаладии омӯзгори экология Заррина Мирзошарипова дар финали Озмуни XI байналмилалии экологӣ иштирок намуда, ба гирифтани мукофоти султони АМА Зайд ибн Султон ба маблағи 100 000 доллар ноил шуданд. Ба ин озмуни бонуфуз аз 130 давлат 2100 лоиҳаҳо пешниҳод шуда, он вақт ба даври финалӣ аз 6 қитъаи ҷаҳон 31 даста таклиф  шуда буданд. Дастаи МТУҒ (хусусии) «Гимназияи ба номи Ё.В. Гёте» лоиҳаи худро дар номинатсияи «Саҳми муассисаҳои таълимӣ дар ҳалли проблемаҳои глобалӣ» оид ба истифодаи энергияи алтернативӣ (энергияи офтоб) байни дастаҳои қитъаи АвруОсиё пешниҳод намуда, ба рақибони худ- Англия ва Арманистон дастболо шуд ва ба қатори 10 нафар барандагони ҷоиза (дастаҳо аз Суб-Сахара, Гватемала, Филлипин, Ҳиндустон, Тоҷикистон, Дубай ва 4 ширкатҳои бонуфуз «We Care Solar», «Sanku», «BBOXX», «ECOSOFTT») дохил гардид. Дар давраи 3 сол гимназия бояд пурра аз мукофот истифода намуда, таҷҳизоти офтобиро дар муассиса насб намояд.

То ин дам таъсисдиҳандагони озмун аллакай 2 маротиба ба суратҳисоби гимназия аз маблағи пешбинишуда гузарониданд. То ин дам боми гимназия аз таъмир бароварда шуда, аз тарафи ҶДММ «Технологияҳои Сабз» (Green Technologies) насби таҷҳизоти офтобӣ ба охир расида истодааст.

Январь 13, 2021 14:13

Хабарҳои дигари ин бахш

Сада — ҷашни ҳамкорӣ ва ҳамбастагии мардум. Аҳли заҳмати ноҳияи Муъминобод дар таҷлили ин иди суннатӣ иштирок намуданд
Ба сокинони ноҳияи Шоҳмансур иҷрои талаботи қонунгузории амалкунандаи Ҷумҳурии Тоҷикистон фаҳмонида шуд
ОБУ ҲАВО: Имрӯз дар Тоҷикистон ҳавои тағйирёбанда дар назар аст
IRS: Роҳи мошингарди Душанбе-Чанок кушода буда, вобаста ба зарурат ҳаракати мошинҳои боркаши ядакдор ва «Фура»-ҳо муваққатан маҳдуд мешавад
Ҳавопаймои «Сомон Эйр» бо сабаби боридани барфи зиёд бо таъхир ба Истанбул парвоз кард
ОБУ ҲАВО: Имрӯз дар Тоҷикистон ҳаво абрнок шуда, борон ва барф меборад
Кӯдакони шаҳри Хоруғ бо фаъолияти кормандони шуъбаи Хадамоти оташнишонӣ аз наздик шинос шуданд
Гулпарвар аз ноҳияи Ҷалолиддини Балхӣ дар тӯли 4 сол соҳибкори муваффақ гардид
Дар ҳашари умумишаҳрӣ дар Истаравшан 7,6 тонна партов берун бароварда шуд
ОБУ ҲАВО: Имрӯз дар шаҳри Душанбе ҳаво 17+19 дараҷа гарм мешавад
Дурдасттарин нуқтаҳои Бадахшон бо алоқаи мобилӣ таъмин мегарданд
Фаъолияти ташкилоти ибтидоии ҳизбии «Сайёҳ» натиҷагирӣ карда шуд