Дар маркази ноҳияи Кӯшониён лавҳи «Қаҳрамонони миллат» қомат меафрозад

ДУШАНБЕ, 18.01.2021. /АМИТ «Ховар»/. Дар хиёбони марказии ноҳияи Кӯшониён сохтмони пойдевори лавҳи «Қаҳрамонони миллат» бо баландии 4,5 метр ва паҳноии 10 метр ҷараён дорад.

Тавре аз шуъбаи иттилоотию таҳлилии дастгоҳи раиси вилояти Хатлон ба АМИТ «Ховар» иттилоъ доданд, сохтмони иншооти мазкур моҳи ноябри соли 2020 оғоз гардид. Лоиҳа бо санъати баланди меъмории миллӣ тарҳрезӣ шуда, корҳои сохтмонӣ бо харҷи беш аз 50 ҳазор сомонӣ ҷараён доранд.

Раиси вилояти Хатлон Қурбон Ҳакимзода дар доираи сафар ба ноҳияи Кӯшониён аз ҷараёни корҳои сохтмонии пойдевори лавҳи «Қаҳрамонони миллат» дидан намуд. Зикр гардид, ки ин лавҳи гиромидошт бо мақсади баланд бардоштани ҳувияти миллӣ ва арҷгузорӣ ба корномаи фарзандони фарзонаи миллат бунёд мегардад.

Раиси вилоят таъкид намуд, ки ҳар яке аз қаҳрамонони Тоҷикистон- Садриддин Айнӣ, Бобоҷон Ғафуров, Эмомалӣ Раҳмон, Мирзо Турсунзода, Нусратулло Махсум ва Шириншоҳ Шоҳтемур дар замони худ чун шахсони ватандӯсту дурандеш барои муаррифии миллати тоҷик дар арсаи ҷаҳон, ҳимояи арзишҳои миллию давлатдорӣ, барқарории сулҳу субот ва устувории давлат саҳми бориз гузоштаанд. Онҳо бар зидди ҳама гуна равияҳои зиёновари миллатгароиву ҷудоиандозӣ мардонавор мубориза бурда, силсилаи иқдомоти иқтисодиву иҷтимоӣ ва фарҳангиро барои таҳкими арзишҳои милливу суннатии тоҷикон ва бунёди давлату давлатдории мардуми Тоҷикистон амалӣ намудаанд.

Ин шахсони матиниродаву донишманд, оқилу дурандеш, сиёсатмадорони барҷаста тамоми қуввату дониш ва неруи маънавиашонро барои поягузорӣ ва бунёди давлати миллии тоҷикон равона сохтаанд.

Қомат афрохтани лавҳи «Қаҳрамонони Тоҷикистон» рамзи эҳтирому арҷгузорӣ ба заҳмату ҷоннисориҳои чеҳраҳои мондагори миллат мебошад.

Акс аз бойгонӣ