Агентии назорати давлатии молиявӣ ва мубориза бо коррупсия қочоқи телефонҳои мобилиро ошкор намуд

ДУШАНБЕ, 12.02.2021 /АМИТ «Ховар»/. Бинобар сабаби қочоқи телефонҳои мобилӣ нисбат ба Саидов Абдурауф Пирназарович парвандаи ҷиноятӣ оғоз карда шудааст. Дар ин бора аз маркази матбуоти Агентии назорати давлатии  молиявӣ ва мубориза бо коррупсия ба АМИТ «Ховар» иттилоъ доданд.

Ба иттилои манбаъ, Абдурауф Саидов бо маслиҳати пешакӣ бо «Шолочо» ном шаҳрванди Ҷумҳурии Қирғизистон 1 июли соли 2020 ба миқдори 20 адад телефонҳои мобилии тамғаи «Samsung Galaxy A10S», 20 адад «Samsung Galaxy A51», 20 адад «Redmi Note 8», 80 адад «Redmi Note 9» ва 20 адад «Redmi Note 9S»-ро бо роҳи кочоқ, яъне бидуни назорати гумрукӣ аз вилояти Ботканди Ҷумҳурии Қирғизистон ба ҳудуди вилояти Суғди Ҷумҳурии Тоҷикистон ворид намудааст.

Мутобиқи хулосаи ташхис, арзиши умумии телефонҳои мобилии болозикр 345 640 сомониро ташкил медиҳад.

Бинобар ин нисбат ба Саидов А.П. бо моддаи 289 қисми 2-и Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, баъди анҷоми тафтиши пешакӣ барои моҳиятан баррасӣ намудан ба суд ирсол карда шуд.