Ду фармондеҳи гурӯҳи «Толибон» дар Ғур кушта шуданд

ДУШАНБЕ, 24.02.2021 /АМИТ «Ховар»/. Мақомоти амниятии вилояти Ғур мегӯянд, ки гурӯҳи «Толибон» (мамнӯъ дар Тоҷикистон) шаби гузашта ба як посгоҳи амниятӣ дар минтақаи Аландар дар ғарби маркази вилоят — Фирӯзкӯҳ ҳамла кард, хабар медиҳад АМИТ «Ховар» бо истинод ба сомонаи иттилоотии Khaama Press.

Амирдод Порсо, сухангӯи фармондеҳии полиси Ғур 22 феврал гуфт, ки дар ин ҳодиса ду тан аз фармондеҳони «Толибон» кушта шудаанд.

Ба гуфтаи ӯ, дар задухӯрд ба неруҳои амниятӣ ва дифоии кишвар осеб нарасидааст.

Порсо инчунин афзуд, ки гурӯҳи «Толибон» дирӯз ба як посгоҳи амниятӣ дар ноҳияи Чаҳор Садаи ин вилоят ҳамла кард, ки бо посухи неруҳои амниятӣ рӯбарӯ шуд ва ин ҳамла ақиб зада шуд.

«Толибон» ҳанӯз ин масъаларо шарҳ надодаанд.