Муҳлати сабти дубораи симкортҳо бо шиносномаҳои ID дар Тоҷикистон моҳи феврали соли 2022 хатм мешавад

ДУШАНБЕ, 02.02.2021 /АМИТ «Ховар»/. Муҳлати сабти дубораи симкортҳо аз шиносномаҳои намунаи кӯҳна бо шиносномаҳои ID-и намунаи соли 2014 дар Тоҷикистон 15 феврали соли 2022 хатм мешавад. Дар ин бора дирӯз, 1 феврал, зимни нишасти хабарӣ муовини сардори Хадамоти алоқаи назди Ҳукумати Ҷумҳурии Тоҷикистон Илҳомҷон Атоев хабар дод.

Ба гуфтаи вай, то имрӯз 4,5 миллион муштарии операторони мобилӣ дар кишвар симкортҳои худро бо шиносномаҳои ID-и модели соли 2014 дубора сабти ном кардаанд. Вале то ҳол симкортҳои 2,6 миллион муштарӣ бо шиносномаҳои намунаи кӯҳна сабт шудаанд.

Ёдовар мешавем, ки тибқи қарори қаблан қабулнамудаи Ҳукумати Ҷумҳурии Тоҷикистон «Дар бораи тартиб ва талаботи пайвастшавӣ ба шабакаҳои телекоммуникатсионӣ ва расонидани хадамоти вобаста ба онҳо», ҳамаи муштариёни телефонҳои мобилӣ бояд симкортҳои худро дубора бо ID шиносномаҳои намунаи соли 2014 то 15 августи соли 2019 сабти ном мекарданд. Ва моҳи августи соли 2019 муҳлати дубора сабти ном намудани онҳо то шаш моҳи дигар — то 15 феврали соли 2020 тамдид шуда буд. Бо қарори Ҳукумати Ҷумҳурии Тоҷикистон аз 15 феврали соли 2020 муҳлати мазкур то 15 феврали соли 2022 тамдид шуд.

АКС аз бойгонӣ