Сардори ҳавзаи панҷуми амниятии шаҳри Кобул дар як таркиш кушта шуд

ДУШАНБЕ, 10.02.2021 /АМИТ «Ховар»/. Ин таркиш дар наздикии чорроҳаи Баракӣ ҳангоме рух дод, ки мошини зиреҳпӯши ҷаноби Кӯчӣ ҳадафи як минаи канори роҳ қарор гирифт, хабар медиҳад АМИТ «Ховар» бо истинод ба шабакаи телевизионии tolonews.com.

Манбаъҳои амниятӣ мегӯянд, ки Муҳаммадзай Кӯчӣ, сардори ҳавзаи  панҷуми амниятии шаҳри Кобул ва ду тан нигоҳбононаш зимни таркиши мина дар Кобул кушта ва захмӣ шуданд.

Полиси Кобул бо нашри як хабар гуфт, ки дар ин ҳодиса ду нафар кушта ва як нафари дигар захмӣ шудаанд, аммо ҷузъиёти бештар дар бораи шахсияти қурбониён ё ҳодиса надоданд.

Полиси Кобул гуфт, ки субҳи имрӯз Кобул шоҳиди се таркиши ҷудогона шуд.

Пеш аз таркиш дар чорроҳаи Баракӣ, як автомашинаи неруҳои амниятӣ дар Қалъаи Абдулалии вулусволии Пағмон мавриди ҳамла қарор гирифт, аммо талафот надоштааст.

Дар ҳамин ҳол, полис гуфт, ки як таркиши дигар дар наздикии қуваҳои марказӣ дар ноҳияи дуюми амниятӣ рух додааст ва дар натиҷа чаҳор нафар захмӣ шудаанд.

Хотиррасон мекунем, ки зимни ҳамлаҳои террористӣ дирӯз дар Кобул дар ҳодисаҳои ҷудогона панҷ нафар кушта шуданд.

Ҳеҷ гурӯҳе, аз ҷумла “Толибон”, масъулияти ин ҳамлаҳоро бар дӯш нагирифтааст.