Соли 2020 аз мавзеъҳои тамошобоби ноҳияи Шаҳринав 4600 нафар сайёҳони дохилию хориҷӣ боздид намуданд

ШАҲРИНАВ, 18.02.2021. /АМИТ «Ховар»/. Дар ноҳияи Шаҳринав як ширкати сайёҳӣ бо номи  ҶДММ «Сайри Қаратоғ» бо 6 хатсайр фаъолият менамояд, ки соли 2020 аз мавзеъҳои сайёҳии Пуштимиёна, Патру, Ҳакимӣ, Обиборик, Тахти Сулаймон, кӯлҳои Темурдара, Париён, Ҷувозак, зиёратгоҳи Хоҷа Ҳасан ва чашмаи моҳиёни Хуҷии ноҳия 4600 нафар сайёҳони дохилию хориҷӣ  боздид намуданд.

Ин матлабро зимни нишасти матбуотӣ иҷрокунандаи раиси ноҳияи  Шаҳринав Ҷаббор Носирзода иброз намуд.

Мақомоти иҷроияи ҳокимияти давлатии ноҳияи Шаҳринав дар якҷоягӣ бо соҳибкорону мардуми ноҳия баҳри дар сатҳи баланд пешвоз гирифтани ҷашни 30- солагии Истиқлоли давлатии Ҷумҳурии Тоҷикистон  сохтмони 442 иншоотро ба нақша гирифтаанд. Аз ин шумора то ба имрӯз дар 305 иншоот корҳои таъмирию сохтмонӣ бо харҷи умумии 42 миллиону 642 ҳазор сомонӣ ва бо  таъсиси 920 ҷойи кори доимию 1116 ҷойи кори мавсимӣ ба анҷом расонида шудаанд. Айни замон сохтмони дигар иншооти дорои аҳамияти гуногун  идома дорад.  Дар ҷамоати шаҳраку деҳоти ноҳия 75 синфхонаи иловагӣ дар муассисаҳои таълимӣ,  майдончаҳои варзишӣ, толори варзишӣ,  8 бунгоҳи тиббӣ, коргоҳи дӯзандагӣ, 71 адад маркази савдо  ва нуқтаи хизматрасонии маишӣ, маҷмааи савдо, 10 адад гармхона, 1 адад сардхона, кошонаи ҳусн, 12 пули мошингузар, 23 чоҳи амудӣ мавриди баҳрабардорӣ қарор  гирифтаанд.

Ҳамзамон дар ноҳия 22 адад трансформатор  насб ва 20 километр роҳҳо мумфарш шуда,   27 адад дарвозаҳои замонавӣ дар деҳот ва дигар намуди иншооти хизматрасонӣ бунёд гардидаанд.