Минаҳои магнитӣ пас аз Афғонистон дар Кашмир нигаронӣ эҷод кардаанд

ДУШАНБЕ, 03.03.2021 /АМИТ «Ховар»/. Минаҳои магнитӣ ё ба гуфтаи омма «часпакӣ», ки ахиран ба бахши асосии хушунатҳо дар Афғонистон табдил ёфтаанд, инчунин сабаби нигаронии неруҳои амниятӣ дар Кашмири таҳти назорати Ҳиндустон шудаанд, хабар медиҳад АМИТ «Ховар» бо истинод ба сомонаи «Садои Амрико» дар Афғонистон www.darivoa.com.

Мақомоти амниятии Ҳиндустон ба хабаргузории «Ройтерз» гуфтаанд, ки дар ҷараёни амалиёт дар минтақаи Ҷамму ва Кашмир дар моҳҳои охир шуморе аз минаҳои магнитӣ ба дасти неруҳои амниятӣ афтодааст.

Сардори полиси водии Кашмир Ваҷӣ Кумар, дар робита ба ин гуфтааст, ки: «Ин васоили хурди тарканда ба қадри кофӣ қудратманданд» ва афзудааст, ки мавҷудияти ин минаҳо ба вазъи амниятӣ дар Кашмир таъсиргузор хоҳад буд.

Пайдо шудани минаҳои магнитӣ дар Кашмир, ки 15-тои он моҳи феврал кашф ва мусодира карда шуд, нигарониҳоро дар мавриди густариши ин усул, усуле, ки ба “Толибон” (мамнуъ дар Тоҷикистон) дар Афғонистон нисбат дода шудаст, дар хусуматҳо байни Ҳиндустон ва Покистон афзоиш додааст.

Тайи моҳҳои охир Афғонистон шоҳиди истифодаи фаровони минаҳои магнитӣ алайҳи неруҳои амниятӣ, додрасҳо, мақомоти давлатӣ, фаъолони ҷомеаи шаҳрвандӣ ва рӯзноманигорон гардид.