МОДАРОНРО ҲАР ПАНҶААШОН ҲУНАР АСТ. Аз рӯзгори як зани ҳунарманд

Март 6, 2021 12:27

ВАРЗОБ, 06.03.2021. /АМИТ «Ховар»/. Ҳунар беҳ аз зар аст ва имрӯз дар Тоҷикистон кӯшиш бар он доранд, ки ҳунармандию касбомӯзӣ, бахусус эҳёи ҳунарҳои қадимӣ бештар ба роҳ монда шавад. Агар маҳсули ҳунари қадимӣ бо диди имрӯза корбаст шавад, он матоъ, ҷома ё ҳар маҳсулоту маснуоти дигари омодашуда дучанд зебо мешавад.

Ин андешаи ҳунарманди мардумӣ Шаҳло Аминова аст. Ӯ ба воситаи оинаи нилгун ва интернет пайваста ҳунарҳои худро сайқал медиҳад.

Шаҳло мегӯяд, ки “ҳунарманд  офаридаи худро бояд мувофиқи пешравии ҷомеа замонавӣ гардонад. Чунки ҷавонони имрӯза мувофиқи замони худ аз дӯхти лобосҳо оғоз намуда, то кӯрпаю болишти арӯсии қуроқӣ ё чодари арӯсии замонавӣ  фармоиш медиҳанд. Дар сурати иҷро намудани хоҳиши фармоишгарон  сафи муштариён зиёд гардида, ҳунарманд бекор намемонад”.

Ҳунар ганҷинаест, ки онро  бо симу зар ва дороӣ иваз кардану харидан номумкин аст. Чунки ҳунар инсонро бузургию шаҳомат бахшида, ӯро болидарӯҳ мегардонад ва ба зиндагии инсон  зебоӣ мебахшад. Барои шахси  ҳунарманд ҳар дақиқаи умр ғанимат аст ва онро  бамаврид истифода мебараду лаҳзае бе манфиат намегузаронад. Аз матое ҷомае медӯзад, аз гуле гулзор ҳосил мекунад. Бо дастони ҳунарманду бузургу меҳнатофаринаш ақли бинандаро тасхир месозад.

Сокини деҳаи Чорбоғи ноҳияи Варзоб Шаҳло Аминова бо ҳунарҳои волои худ дар зиндагӣ боломақому устоди ботаҷриба ва бузургдилу баобрӯ гардидааст. Ӯ аз хурдӣ ҳунарҳои дӯзандагӣ, қуроқдӯзӣ, шероздӯзӣ ва кӯрпадӯзиро дар назди модари меҳрубонаш ёд гирифтааст. Имрӯзҳо ин ҳунарҳои худро ба  фарзандону духтарони ҳамсояҳо ва хешутабору аҳли оилааш меомӯзонад.

Шаҳло Аминова аз он хурсанд аст, ки имрӯзҳо бахшида ба Солҳои рушди сайёҳӣ ва ҳунарҳои мардумӣ ва супоришҳои пайвастаи Пешвои миллат муҳтарам Эмомалӣ Раҳмон ҳунармандони асил дастгирӣ ёфта,  меҳнати онҳо ба мардуми ҷумҳурӣ ва берун аз он  муаррифӣ мегарданд.

Шаҳло Аминова иброз дошт, ки “ҳунарманди асил бо ҳунари худ дар ягон давру замон ба касе ё чизе эҳтиёҷ пайдо намекунад. Дастнигар намегардад, зеро худ кони ҳунар аст. Барои мисол, имрӯзҳо ман мувофиқи хоҳиши арӯсон ё фармоишгарон аз кӯрпаҳои қуроқдӯзӣ оғоз намуда,  то шерозпочаю либосҳои наварӯсонро дар якҷоягӣ бо келин ва духтаронам медӯзем, ки ин барои оилаи мо дар як моҳ аз 3000  то 4000 сомонӣ фоидаи тоза ба даст меорад.

Ҳамчунин мувофиқи дархости роҳбарияти Ҷамоати деҳоти Чорбоғи ноҳия ҳунарҳои омода намудаамонро дар намоишгоҳҳои ҷумҳуриявӣ ба намоиш мегузорем, ки бештари вақт маҳсулоти аз ҳунари қуроқидӯзии омоданамудаамон зуд ба фурӯш меравад”.

Бештари муштариёни Шаҳло Аминова  наварӯсон мебошанд. Онҳо мувофиқи фарҳанги миллии имрӯза бештар кӯрпаю болишт ва матои  дастархони  қуроқӣ фармоиш медиҳанд. Ин ҳунарманди асил мегӯяд, ки ҳунари қуроқдӯзӣ аз матоъпораи гуногун истеъдоди  баланд талаб мекунад. Агар шавқу ҳавас бошад, барои ҳунарманд дӯхтани он  хеле осон аст ва дар муддати як ҳафта ё зиёдтар аз он фармоиши муштариро иҷро менамоӣ.

Раиси Шӯрои занони Ҷамоати деҳоти Чорбоғ  Норгул Холова гуфт, ки “Шаҳло Аминова дар оилаи ҳунарманд тарбия ёфта,  духтару келин  ва фарзандони хешу ҳамсояҳояшро бо истеъдоди омӯзгорияш ба таври ройгон ҳунарманд гардонидааст. Ӯ дар баробари ҳунармандӣ дар корҳои ҷамъиятӣ бо аҳлу оилааш саҳми арзанда мегузорад”.

Шаҳло барои истеъдоди баланди ҳунармандӣ ва саҳм гузоштан дар рушди ҳунарҳои мардумӣ аз тарафи Мақомоти иҷроия ноҳияи Варзоб борҳо бо ифтихорномаю сипоснома ва туҳфаҳои хотиравӣ қадрдонӣ шудааст.  Имрӯзҳо ҷавонони мо,  махсусан ҷавондухтарон  бояд мисли Шаҳло Аминова  дар баробари илмомӯзӣ касбу ҳунар низ аз худ намоянд, то дар оянда барои пешрафти зиндагияшон кумак кунаду аз он манфиат гиранд.

Субҳониддини МАҲМУД,
АМИТ «Ховар»

Март 6, 2021 12:27

Хабарҳои дигари ин бахш

«Сомон Эйр» дар парвози аввалини мунтазам 184 мусофирро ба пойтахти Россия расонид
ВКД Федератсияи Россия қонуне таҳия мекунад, ки ба муҳоҷирон имкон медиҳад буду боши худро дар Россия қонунӣ гардонанд
Агентии авиатсияи гражданӣ ширкатҳои ҳавопаймоии «СомонЭйр» ва «UTair»-ро ҳушдор дод, ки нархи чиптаро беасос боло набаранд
Дар Конибодом ва Мастчоҳ хонандагон соҳиби ҳуҷҷати асосии тасдиқкунандаи шахсият – шиноснома гардиданд
Дар Ҷамоати деҳоти Ворух курсҳои кӯтоҳмуддати омӯзишии ройгон барои бонувон ба роҳ монда шуданд
Кумитаи ҳолатҳои фавқулода ва мудофиаи гражданӣ аз ҳавои номусоиди рӯзҳои оянда ҳушдор медиҳад
Имрӯз — Рӯзи умумиҷаҳонии паҳннамоии иттилоот оид ба аутизм. Кӯдакони гирифтори ин беморӣ муҳтоҷи дастгирии махсусанд
Бахшида ба «100 рӯзи муқовимат ба савдои одамон» дар Хуҷанд ҳамоиш доир шуд
Бориши шадид сабаби ҳолати фавқулода дар ҷануби Тоҷикистон шуда, 250 сокини маҳаллӣ ба ҷойҳои бехатар кӯчонида шуданд
Наврӯз Ҷаъфаров: Омили пайдоиши вируси фалаҷи кӯдакона сари вақт ваксинатсия нашудани тифлон аст
ТАВАҶҶУҲ! Бар асари бориши зиёд дар роҳҳои кӯҳии Тоҷикистон эҳтимоли лағзиши тарма ва резиши сангу рег зиёд аст
НАМУНА БАРОИ ИБРАТ. Соҳибкори нафақахӯр барои хонандагони Ҳисор синфхонаҳои омӯзиши забонҳои хориҷӣ бунёд намуд

Маводҳои таҳлилӣ