Мулоқоти Пешвои миллат Эмомалӣ Раҳмон бо роҳбарон ва фаъолони вилояти Хатлон

ДУШАНБЕ, 26.03.2021 /АМИТ «Ховар»/. Баъди ифтитоҳи мактаби нав Президенти мамлакат муҳтарам Эмомалӣ Раҳмон бо роҳбарону фаъолони вилояти Хатлон мулоқот карданд.

Сарвари давлат муҳтарам Эмомалӣ Раҳмон нахуст ҳамаи иштирокчиёни вохӯриро бо Наврӯзи байналмилалӣ ва ифтитоҳи боз як мактаби наву замонавӣ барои фарзандони сокинони ноҳияи Кӯшониён, табрику таҳният гуфтанд.

Президенти мамлакат муҳтарам Эмомалӣ Раҳмон ҳадафи сафари кориро дар шаҳру ноҳияҳои Бохтар, Балхӣ, Кӯшониён ва Ёвони вилояти Хатлон шиносоӣ бо шароити зиндагии мардум, истифодаи самараноки заминҳои наздиҳавлигӣ, оғози кишту кори баҳорӣ, ифтитоҳи қатор иншооти таъиноти гуногун, таъсиси ҷойҳои нави корӣ, ҳидояти мардум барои сарфаю сариштакорӣ ва истеҳсолу захираи зарурии маводи хӯрокворӣ маънидод карданд.

Зимни суханронӣ Пешвои миллат доир ба омодагии шаҳру ноҳияҳои вилоят ба ҷашни бузурги миллӣ 30 — солагии Истиқлоли давлатӣ андешаронӣ карда, таъкид намуданд, ки тибқи нақшаи чорабиниҳои ободониву бунёдкорӣ то имрӯз дар вилоят 6290 иншоот сохта, ба истифода дода шуда, дар ин замина беш аз 21 ҳазор ҷойи нави корӣ ташкил карда шудааст.

Вобаста ба иҷрои пурра нақшаҳои созанда Президенти мамлакат роҳбарони мақомоти иҷроияи ҳокимияти давлатии вилояти Хатлон ва шаҳру ноҳияҳои онро вазифадор карданд, ки ҳамкориро бо сокинони вилоят, хусусан, соҳибкорон ва шахсони саховатманд тақвият бахшида, вусъат додани корҳои ободониву созандагӣ ва дар сатҳи баланд истиқбол гирифтани ҷашни умумимиллӣ таъмин намоянд.

Сарвари давлат таъкид карданд, ки аз хонаҳои истиқоматӣ сар карда, ба тозаву озода намудани ҳудуди шаҳру деҳаҳо, аз ҷумла маҳалҳои аҳолинишин, кӯчаву хиёбонҳо ва таҷдиду бунёди роҳу пулҳо, иншооти иҷтимоиву истеҳсолӣ, хусусан, коргоҳҳои истеҳсолӣ ва корхонаҳои саноатӣ таваҷҷуҳи хосса дода шавад.

Соли 2020 ҳаҷми маҷмӯи маҳсулоти вилоят ба 22,1 миллиард сомонӣ ва ҳиссаи он дар маҷмӯи маҳсулоти дохилии кишвар ба 27 фоиз баробар гардидааст. Барои ҳалли масъалаҳои рушди иҷтимоиву иқтисодии шаҳру ноҳияҳои вилоят дар даҳ соли охир аз ҳисоби буҷети давлатӣ 24 миллиард сомонӣ равона шудааст.

Илова бар ин, барои таъмин намудани тараққиёти соҳаҳои мухталифи иқтисодиёти вилоят ва баланд бардоштани сатҳу сифати зиндагии аҳолӣ дар барномаи нави рушди иҷтимоиву иқтисодии вилояти Хатлон барои солҳои 2021 — 2025 амалисозии 279 лоиҳа ба маблағи умумии зиёда аз 10,5 миллиард сомонӣ пешбинӣ гардидааст.

Дар давраи соҳибистиқолӣ аз ҷониби Ҳукумати мамлакат дар вилоят 71 лоиҳаи сармоягузории давлатӣ амалӣ шуда, маблағи дар доираи онҳо азхудшуда беш аз 11 миллиард сомониро ташкил медиҳад. Ҳоло дар ҳудуди вилоят татбиқи боз 35 лоиҳаи сармоягузории давлатӣ идома дошта, дар доираи онҳо то имрӯз беш аз 5,5 миллиард сомонӣ аз худ карда шудааст.

Шумораи умумии корхонаҳои саноатии дар давраи соҳибистиқлолии кишвар дар шаҳру ноҳияҳои вилояти Хатлон бунёдгардида аввали соли 2021 ба 620 расидааст, ки аз ин ҳисоб 37 корхона дар соли 2020 таъсис ёфтааст.

Роҳбарони мақомоти иҷроияи ҳокимияти давлатии вилояти Хатлон ва шаҳру ноҳияҳои он вазифадор шуданд, ки якҷо бо Вазорати саноат ва технологияҳои нав ва дигар вазорату идораҳои дахлдор ҷиҳати бо иқтидори пурра ба кор даровардани корхонаҳои саноатӣ, хусусан, дар самти барқарор намудани корхонаҳои аз фаъолият бозмонда нақшаи мушаххаси чорабиниҳо таҳия карда, иҷрои онро таъмин созанд.

Соҳаи кишоварзӣ яке аз самтҳои афзалиятноки иқтисодиёти вилоят буда, нақши он дар ҳифзи амнияти озуқавории вилоят ва кишвар, рушди соҳаҳои саноат, афзоиши имкониятҳои содиротии вилоят ва таъсиси ҷойҳои нави корӣ хеле муҳим мебошад.

Вобаста ба ҳалли мушкилоти соҳаи кишоварзӣ дар вилоят роҳбарони вилоят ва шаҳру ноҳияҳо якҷо бо вазорату идораҳои дахлдор супориш гирифтанд, ки ҷиҳати беҳтар намудани ҳолати мелиоративии заминҳои кишоварзӣ, барқарорсозии заминҳои аз гардиши кишоварзӣ берунмонда, сари вақт гузаронидани кишти баҳории зироатҳо, афзоиш додани ҳаҷми истеҳсоли маҳсулоти кишоварзӣ, коркард ва содироти он, инчунин, ташкили инфрасохтори содиротӣ тадбирҳои мушаххас андешанд. Бо дарназардошти имкониятҳои фаровони вилоят рушди соҳаҳои пахтакорӣ, чорводорӣ, парандапарварӣ, моҳипарварӣ ва дар ин замина ба роҳ мондани коркарди саноатии маҳсулоти соҳаҳои зикршуда, афзоиш додани истеҳсоли маҳсулоти ғизоӣ ва муҳайё кардани ҷойҳои нави кориро таъмин намоянд.

Дар шароити шиддат гирифтани таҳдиду хатарҳои ҷаҳони муосир, аз ҷумла вобаста ба пайомадҳои пандемияи коронавирус, низоъҳои сиёсиву тиҷоратӣ, тағйирёбии иқлим ва оқибатҳои харобиовари он соли 2021 бисёр мураккабу вазнин пешгӯӣ мешавад.

Аз ин рӯ, Сарвари давлат таъкид намуданд, ки барои ҳифзи амнияти озуқавории кишвар ва бо ҷойи корӣ таъмин намудани шаҳрвандон роҳбарони вилоятҳо ва шаҳру ноҳияҳо, хоҷагиҳои деҳқонӣ, тамоми кишоварзон ва ҳар як оиларо зарур аст, ки истифодаи самараноки замин, аз ҷумла заминҳои наздиҳавлигиву президентӣ, заминҳои байни боғҳо ва бо ҳамин роҳ гирифтани се — чор ҳосил ва захира намудани озуқавориро дар ҳар як оила таъмин намоянд.

Соли 2020 дар вилоят татбиқи 10 лоиҳаи сармоягузории давлатӣ дар соҳаи нақлиёт, аз ҷумла марҳалаҳои якум ва дуюми лоиҳаи таҷдиду сохтмони роҳҳои мошингарди Душанбе — Бохтар ба маблағи умумии 2,3 миллиард сомонӣ, сохтмони роҳи мошингарди Кӯлоб — Қалъаихумб, қитъаҳои Кӯлоб — Шамсиддини Шоҳин ва Шкев — Қалъаихумб ба маблағи қариб 1 миллиард сомонӣ амалӣ шуда истодааст.

Зимни суханронӣ Президенти мамлакат муҳтарам Эмомалӣ Раҳмон вазъи соҳаҳои иҷтимоӣ, аз ҷумла маорифу тандурустиро таҳлил намуда, мақомоти иҷроияи ҳокимияти давлатии вилояти Хатлон, шаҳру ноҳияҳои он, Вазорати маориф ва илм ва Вазорати тандурустӣ ва ҳифзи иҷтимоиро вазифадор карданд, ки ҷиҳати ҳалли мушкилоту масъалаҳои вобаста ба бунёди муассисаҳои таълимӣ, тандурустӣ, иҷрои саривақтӣ ва босифати барномаҳои давлатии соҳаҳо, инчунин, таъмини кадрҳои заруриро таъмин намоянд.

Вобаста ба вазнинии вазъи таъминот бо озуқаворӣ дар тамоми дунё, ки дар натиҷаи пандемияи бемории сироятии нав тамоми кишварҳоро фаро гирифт, Президенти Ҷумҳурии Тоҷикистон бори дигар ба тамоми мардуми Тоҷикистон, аз ҷумла ба ҳамаи сокинони вилояти Хатлон, ки калонтарин вилояти кишоварзии мамлакат мебошад, муроҷиат карда, таъкид намуданд, ки мо бояд аз захираву имкониятҳои мавҷуда, аз ҷумла замин ва об самаранок истифода намуда, тамоми кӯшишу ғайрати худро барои рӯёнидани се — чор ҳосил ва ҳарчи бештар истеҳсол кардани маҳсулоти ватанӣ, беҳтар таъмин намудани талаботи аҳолии кишвар, тақвияти иқтидори иқтисодии давлат ва имкониятҳои содиротии он равона созем.

Ҳамчунин аз тамоми мардуми шарифи Тоҷикистон, ҷавонон ва занону бонувони бонангу номуси кишвар, соҳибкорони ватандӯст ва ҳамаи шахсони саховатпеша даъват карда шуд, ки барои истиқболи арзандаи ҷашни бузурги миллиамон — сисолагии истиқлоли давлатӣ ҳар рӯзро самаранок истифода карда, корҳои ободониву созандагии Ватани маҳбубамонро вусъат бахшанд.

Дар охир Сарвари давлат бо итминон иброз доштанд, ки мардуми бонангу номус ва матиниродаи вилояти Хатлон, хусусан, бо дарназардошти вазъи ҷаҳони имрӯза минбаъд низ дар ҳифзи дастовардҳои таърихии халқамон, ҳимояи манфиатҳои давлату миллати куҳанбунёдамон омода хоҳанд буд ва бо заҳмати содиқонаву софдилонаи худ Ватани маҳбубамонро боз ҳам ободу пешрафта хоҳанд гардонид.

Пас аз суханронии Президенти Ҷумҳурии Тоҷикистон муҳтарам Эмомалӣ Раҳмон раиси вилояти Хатлон Қурбон Ҳакимзода, раисони шаҳру ноҳияҳои Бохтар, Балхӣ, Кӯшониён ва Ёвони вилояти Хатлон оид ба рафти бунёдкориҳо, рушди соҳаи саноат, коҳиш додани ҳаҷми бақияпулиҳои андоз, пардохти ҳаққи истифодаи барқ, таъсиси ҷойҳои нав корӣ, истиқболи сазовори ҷашни 30-солагии Истиқлоли давлатӣ, истифодаи самараноки замин, танзими анъана ва ҷашну маросимҳо, таъмини соҳаҳои маорифу тандурустӣ бо кадрҳои баландихтисос, аз байн бурдани қонунвайронкуниҳо дар самти истифодаи замин, ба Сарвари давлат ҳисобот доданд.

Дар охир Президенти мамлакат муҳтарам Эмомалӣ Раҳмон бори дигар таваҷҷуҳи иштирокчиёни мулоқотро ба вусъати корҳои баҳорӣ, коҳиш додани таъсири омилҳои беруна ба иқтисодиёти мамлакат, истеҳсолу захираи кофии маводи ғизоӣ, омодагии ҳамаҷониба ба таҷлили ҷашни умумимиллӣ 30-юмин солгарди истиқлоли давлатӣ ва иҷрои саривақтию босамари дастуру супоришҳои Ҳукумати мамлакат ҷалб карданд.