Бар асари таркиши автомашинаи пур аз маводи тарканда дар Фароҳи Афғонистон 3 нафар ҳалок ва 22 тани дигар маҷрӯҳ шуданд

ДУШАНБЕ, 14.04.2021 /АМИТ «Ховар»/ Дар натиҷаи таркиши автомашинаи пур аз маводи тарканда дар вилояти Фароҳи Афғонистон се нафар ҳалок ва 22 тани дигар маҷрӯҳ шуданд. Додуллоҳ Қонеъ, раиси Шӯрои вилояти Фароҳ, ба «8 Субҳ» гуфт, ки автомашинаи  «Сузуки», ки дар он  маводи тарканда ҷойсозӣ шуда буд, нимаи дуюми рӯзи сешанбе 13 апрел дар мавзеи Қалъаи Ғулом Сиддиқи шаҳри Фароҳ тарконида шуд, хабар медиҳад АМИТ «Ховар» бо истинод ба сомонаи “8 Субҳ” 8am.af.

Ба гуфтаи ӯ, ҳадафи ин ҳамла яке аз шуъбаҳои раёсати полиси Фароҳ будааст. Бар асари таркиш се шахрванди ғайринизомӣ кушта ва 22 тани дигар, аз ҷумла чаҳор корманди полис захмӣ шуданд.

Раиси Шӯрои вилоятӣ илова кард, ки дар байни захмишудагон занон, кӯдакон ва куҳансолон низ ҳастанд.

Дар ҳамин ҳол, сухангӯи вазорати корҳои дохилӣ Ториқ Орин дар сафҳаи расмии худ дар Фейсбук навиштааст, ки дар ин ҳодиса шаш корманди полис захмӣ шуданд.

«Се ҳамватани ғайринизомии мо, аз ҷумла як кӯдаки шаҳид ва 18 нафари дигар, аз ҷумла кӯдакон маҷрӯҳ шуданд ва вазъи чор нафари онҳо вазнин аст», — навиштааст ӯ.

Сухангӯи Вазорати корҳои дохилӣ «Толибон»-ро (мамнӯъ дар Тоҷикистон) дар ин ҳамлаи террористӣ айбдор кард, аммо онҳо ҳанӯз изҳори назар накардаанд.

Гурӯҳи кории муштараки муҳофизати шаҳрвандони ғайри низомӣ чанде пеш дар як нишасти хабарӣ тарафҳои даргирро ба оташбас дар моҳи Рамазон даъват карда буд, аммо Фароҳ шоҳиди таркиши қавӣ дар рӯзи аввали моҳи Рамазон шуд.