ДУШАНБЕ, 30.04.2021 /АМИТ «Ховар»/. Полиси Бағлони Афғонистон ба рӯзномаи «8-и субҳ» иттилоъ додааст, ки «Толибон» (мамнуъ дар Тоҷикистон) ҳафт намозгузорро дар вулусволии Хинҷони вилоят тирборон карданд, хабар медиҳад АМИТ «Ховар» бо истинод ба сомонаи “8 Субҳ” 8am.af.

Ин ҳодиса шаби панҷшанбеи 29 апрел дар дараи Валиёни вулусволии Хинҷони вилояти Бағлон рух додааст.

Сухангӯи полиси Бағлон Аҳмад Ҷовид Башорат ба рӯзномаи «8 субҳ» гуфт, ки ҳафт намозгузор, ки барои адои намози таровеҳ дар масҷид ҷамъ омада буданд, аз ҷониби ҷангҷӯёни «Толибон» кушта шуданд.

Тибқи гуфтаи Башорат, дар байни қурбониён ду кӯдак низ буданд ва онҳо ҳангоми баромадан аз масҷид ҳадафи ҳамлаи ҷангҷӯён қарор гирифтанд.

Сухангӯи полиси Бағлон илова кардааст, ки дар натиҷаи задухӯрд бо кормандони полис аз ҷумлаи муҳоҷимон ду тан кушта ва се нафари дигари онҳо маҷрӯҳ ва фирор кардаанд.

Баъзе манбаъҳо хабар додаанд, ки ҳамаи қурбониён аъзои як оила ва хешовандони як корманди полис будаанд.

Пеш аз ин дар вилоятҳои Лағмон ва Нангарҳор низ дар рӯйдодҳои мушобеҳ одамони осоишта ҳангоми адои намози таровеҳ кушта шуда буданд.