Дар ноҳияи Ҳамадонӣ 188 нафар соҳиби ҷои кори доимӣ шуданд

ҲАМАДОНӢ, 11.04.2021 /АМИТ «Ховар»/. Дар ноҳияи Мир Сайид Алии Ҳамадонӣ аз ҷониби  шуъбаи Агентии  меҳнат ва шуғли  аҳолӣ дар 3 моҳи  соли равон 4 маротиба  ярмаркаи ҷойҳои кории холӣ гузаронида  шуда,  188  нафар бо ҷои кори доимӣ таъмин гардиданд.

Сардори шуъбаи мазкур  Самандар Мисайнов ба мухбири АМИТ «Ховар» иброз намуд, ки баъзе аз муроҷиаткунандагон ба соҳаҳои маориф, тандурустӣ, фарҳанг, ташкилоту муассисаҳо ва  дигар  корҳои ҷамъиятӣ  сафарбар карда шуданд.

Инчунин дар  ин давра  аз тарафи шуъба  96 нафар сокинони ноҳия  ба омӯзиши  курси кӯтоҳмуддат,  аз ҷумла дӯзандагӣ, бофандагӣ, асосҳои омӯзиши компютерӣ, муҳрабофӣ  ва занбӯри асалпарварӣ  фаро гирифта шуданд, ки 34 фоизи  нақшаро дар бар мегирад.

Яке  аз самтҳои дигари  фаъолияти шуъба-  ин додани қарзҳои  имтиёзнок  мебошад. Дар ин самт  аз ҷониби мақомоти давлатии  шуғли аҳолӣ  ба шаҳрвандони бекоре, ки  хоҳиши фаъолияти соҳибкорӣ  доранд, хизмати машваратӣ  расонида шуда, кумаки молиявӣ  дода мешавад. Бо ин мақсад  аз тарафи шуъба ба  12 нафар  қарзҳои  хурди имтиёзнок  дода шуданд, ки  асосан ба  фаъолияти соҳибкорӣ, чорводорӣ  ва хизматрасонӣ равона карда мешаванд.

Аз тарафи масъулини шуъба  мунтазам корҳои фаҳмондадиҳӣ ва семинарҳои омӯзишӣ  гузаронида мешаванд, то дар оянда низ ҷавондухтарон ва ҷавонписарон  ба курсҳои  кӯтоҳмуддат ҷалб шаванд.