Даври дуюми шаҳрии озмуни «Ҷоизаи давлатии Ҷумҳурии Тоҷикистон барои олимону омўзгорони фанҳои табиатшиносӣ, дақиқ ва риёзӣ» ҷамъбаст шуд

Апрель 8, 2021 12:20

ДУШАНБЕ, 08.04.2021 /АМИТ «Ховар»/.  Даври дуюми шаҳрии озмуни «Ҷоизаи давлатии Ҷумҳурии Тоҷикистон барои олимону омўзгорони фанҳои табиатшиносӣ, дақиқ ва риёзӣ» дар шаҳри Душанбе ҷамъбаст гардид. Дар он аз чор ноҳияи пойтахт сенафарӣ иштирок намуданд, ки чор нафари онҳо омӯзгори Литсейи Президентӣ Ҳушанг Собиров, омӯзгори Муассисаи таълимии давлатии Литсейи №3 барои хонандагони болаёқати шаҳри Душанбе Азизбек Зумратов, омӯзгори Муассисаи таълимии давлатии Литсейи №3 барои хонандагони болаёқати шаҳри Душанбе Фароғат Рӯзиева ва  омӯзгори Литсейи назди Донишгоҳи миллии Тоҷикистон Асадулло Шарипов бо ба даст овардани натиҷаи беҳтар ба даври ҷумҳуриявии озмун роҳхат гирифтанд.

Тавре ба хабарнигори АМИТ «Ховар» сардори Раёсати муассисаҳои томактабӣ ва миёнаи умумии Сарраёсати маорифи шаҳри Душанбе Асомиддин Бобозода иброз дошт, дар даври дуюми озмун 12 нафар омӯзгорон аз муассисаҳои таълимии пойтахт аз рӯйи 8 шарт: барои навоварӣ, таҷрибаи педагогӣ ва нашри мақолаҳои илмию методӣ, барои ҳар патенти ихтироот ё модели муфид, ки дар якҷоягӣ бо хонандагон аз рӯи равия татбиқ шудааст,  барои донистани санадҳои меъёрии ҳуқуқии соҳа, донишҳои соҳавӣ ва сатҳи забондонӣ (амалӣ), дастур ва китобҳои дарсии нашршуда, барои маҳорати истифодаи технологияҳои иттилоотию коммуникатсионӣ, барои омода намудани хонандагон дар озмуну олимпиадаҳои ҷумҳуриявӣ (аз рӯи равия ва ишғоли ҷои ифтихорӣ), барои омода намудани хонандагон дар озмуну олимпиадаҳои байналмилалӣ (аз рӯи равия ва ишғоли ҷои ифтихорӣ) ва иштироки фаъолона дар чорабиниҳои илмиву педагогӣ ва корҳои ҷамъиятӣ байни худ рақобат намуданд.

Бо мақсади дар сатҳи зарурӣ ва шаффоф баргузории даври дуюми озмун дар баробари кормандони масъули Сарраёсати маориф, инчунин мутахассисон аз Донишкадаи такмили ихтисос ва бозомўзии кормандони соҳаи маорифи Ҷумҳурии Тоҷикистон дар шаҳри Душанбе, кафедраи технологияи иттилоотӣ ва амнияти иттилоотии Академияи идоракунии назди Президенти Ҷумҳурии Тоҷикистон, Муассисаи давлатии «Маркази рушди истеъдодҳои назди Сарраёсати маорифи шаҳри Душанбе» ва Литсейи касбии политехникии шаҳри Душанбе ҷалб гардиданд.

Мавриди зикр аст, ки бо Қарори Ҳукумати Ҷумҳурии Тоҷикистон аз 26 ноябри соли 2020 «Низомномаи озмуни «Ҷоизаи давлатии Ҷумҳурии Тоҷикистон барои олимону омўзгорони фанҳои табиатшиносӣ, дақиқ ва риёзӣ» таъсис гардид, ки  ҳамасола барои дарёфти он  озмун  эълон шуда,  барои ҳар ғолиб   мукофоти пулӣ- 20 000 сомонӣ  тақдим мегардад. Озмун барои дарёфти ҷоизаи давлатӣ барои олимон дар ду давр: дохилиидоравӣ (муассисае, ки олим дар он ҷо фаъолият мекунад) ва ҷумҳуриявӣ- барои омӯзгорон дар се давр: шаҳрӣ (ноҳиявӣ), вилоятӣ ва ҷумҳуриявӣ гузаронида мешавад.

Ҳадаф аз таъсис ва сарфароз намудан бо ҷоизаи давлатӣ- ин татбиқ намудани сиёсати давлатӣ дар соҳаи илм, маориф ва инноватсия бо роҳи ҳавасмандкунии олимону омӯзгорони фанҳои табиатшиносӣ, дақиқ ва риёзӣ буда, ба рушди фанҳои мазкур, фаъолияти эҷодии олимону омӯзгорон, баланд бардоштани мақоми онҳо дар ҷомеа, такмили методикаи таълим ва омӯзиши фанҳои табиатшиносӣ, дақиқ ва риёзӣ аз ҷониби хонандагону донишҷӯён, магистрантон ва докторантон аз рӯйи ихтисос  равона гардидааст.

Аксҳо аз Сарраёсати маорифи шаҳри Душанбе

Апрель 8, 2021 12:20

Хабарҳои дигари ин бахш

Дар Сеул байни китобхонаҳои миллии Тоҷикистон ва Корея Ёддошти тафоҳум ба имзо расид
Директори Театри опера ва балети Тоҷикистон ба кишварҳои ИДМ ҳамкории эҷодӣ ва таълимӣ пешниҳод намуд
Дар Бӯстон ба ифтихори Рӯзи забони давлатӣ ҳамоиш баргузор гардид
МУЖДАҲОИ РУҲБАХШИ ЗИНДАГӢ ДАР ШЕЪРИ ҲОФИЗ. Эҳдо ба таҷлили Рӯзи байналмилалии Хоҷа Ҳофизи Шерозӣ
Маркази саратоншиносии вилояти Суғд бо таҷҳизоти табобатии нурии саратонӣ таъмин гардид
Тараннуми дӯстию рафоқат ва мақоми инсон дар ҷомеа дар маркази афкори эҷодии Ҳофизи Шерозӣ қарор дорад
Чанд мулоҳиза дар бораи нусхаи тозаи «Девон»-и Ҳофиз. Эҳдо ба 700-солагии зодрӯзи Ҳофизи Шерозӣ
ШАҲРИ ҲУНАРМАНДӢ ВА ҲУНАРМАНДОН. Истаравшан макони ҷалби сайёҳон аст
Дар Душанбе бахшида ба 700-солагии Ҳофизи Шерозӣ конференсияи байналмилалӣ оғоз гардид
ПАЁМИ ҲУВИЯТСОЗИ ҲОФИЗ. Эҳдо ба 700-солагии Хоҷа Ҳофизи Шерозӣ
Даври ниҳоии Озмуни ҷумҳуриявии «Донандаи беҳтарини асарҳои Пешвои миллат» оғоз гардид
Нахустин шумораи маҷаллаи «Навиди илм» ба нашр расид