«ҲИФЗИ МЕРОС». Бо мақсади муаррифии сазовори таъриху фарҳанги миллати тоҷик маҷаллаи илмӣ ба нашр расид

ДУШАНБЕ, 07.12.2025 /АМИТ «Ховар»/. Бо дастури Пешвои миллат муҳтарам Эмомалӣ Раҳмон бо мақсади муаррифии сазовори таъриху фарҳанги миллӣ шумораи нахустини маҷаллаи илмии «Ҳифзи мерос»-и Агентии ҳифзи мероси таърихию фарҳангии назди Ҳукумати Ҷумҳурии Тоҷикистон ба нашр расид, иттилоъ доданд ба АМИТ «Ховар» аз ин агентӣ.

Маҷалла бо се забон- тоҷикӣ, русӣ ва англисӣ нашр гардида,  доираи васеи таърихнигорону бостоншиносони дохилу хориҷи мамлакатро бо дастовардҳои ҳифзи мероси таърихию фарҳангӣ дар соҳаи бақайдгирӣ, феҳристнигорӣ, ҳифз, тармим ва истифодаи ёдгориҳои таърихию фарҳангӣ шинос менамояд.

Тавре директори агентӣ Шералӣ Хоҷазода иброз намуд, нашрия бароои муаррифии шахсиятҳои барҷастаи таърихии миллат ва санаҳои бузурги таърихӣ, пешниҳоди ёдгориҳои мероси моддӣ ва ғайримоддӣ ба ЮНЕСКО, осорхонашиносӣ ва бостоншиносӣ барои доираи васеи мутахассисони таъриху фарҳанги миллӣ хизмат менамояд. Инчунин ба воситаи ин маҷалла таъриху фарҳанги миллати куҳанбунёди тоҷик дар арсаи ҷаҳон муаррифӣ мегардад.

«Ба маҷалла олимону мутахассисони касбии соҳавӣ ҳам аз Ҷумҳурии Тоҷикистон ва ҳам аз хориҷи мамлакат мақола пешниҳод намудаанд, ки самтҳои бостоншиносӣ, тармиму барқарорсозӣ, мероси моддӣ ва ғайримоддиро дар бар мегиранд», — афзуд директори агентӣ.

Ҳадафи таъсиси маҷаллаи «Ҳифзи мерос» ба шакли дуруст ва илман асоснокшуда дастрас намудани тамоми маводе аст, ки бевосита ба таъриху фарҳанги миллат марбутанд. Ин маҷалла дар замони ҷаҳонишавии тамаддунҳо, таъриху фарҳангсозиҳои ҷаҳонӣ бояд дар самти ҳифзи мероси таърихӣ ва муаррифии таъриху фарҳанги миллӣ мавқеи муҳими соҳавӣ касб намояд.

Мақолаҳое, ки дар маҷалла интишор мегарданд, ба самти таърих, бостоншиносӣ, фарҳангшиносӣ, мероси хаттӣ, мероси моддӣ ва ғайримоддии миллати тоҷик равона гардидаанд.

АКС: АМИТ «Ховар»