Неруҳои амниятии Афғонистон чанде аз рустоҳои вулусволии Нусайи вилояти Бадахшонро аз «Толибон» бозпас гирифтанд

ДУШАНБЕ, 05.04.2021 /АМИТ «Ховар»/. Манобеи амниятӣ мегӯянд, ки дар натиҷаи амалиёти ҳавоӣ ва заминии неруҳои амниятӣ дар вулусволии Нусайи вулусволии Дарвози вилояти Бадахшони Афғонистон ҳудуди 70 узви гурӯҳи «Толибон» кушта ва захмӣ шуданд, хабар медиҳад АМИТ «Ховар» бо истинод ба сомонаи «Ҳашти субҳ» 8am.af com.

Вазорати мудофиаи миллӣ рӯзи 04 апрел эълом дошт, ки як қатор мавзеъҳои «Толибон»-ро (мамнӯъ дар Тоҷикистон) дар вулусволии Нусай пас аз се сол бо ворид намудани талафоти зиёд ба ин гурӯх тасарруф кардааст.

Тибқи эъломи вазорат, дар ин амалиёт неруҳои артиши миллӣ, десантчиён, полис ва воҳидҳои хезиши мардумӣ ширкат карданд.

Ҳамин тариқ, Вазорати мудофиаи миллӣ эълон кард, ки тамоми баландиҳои Қӯғаз, Кӯҳи девлох, Сари сағочҳо, Кӯҳи Лалми Кудин, Кӯҳи Каҷакҳо ва минтақаи сабз то пули Дуоб ба тасарруфи неруҳои амниятӣ даромадаанд. Ин минтақаҳо беш аз се сол таҳти назорати «Толибон» қарор доштанд.

Саноуллоҳ Рӯҳонӣ, сухангӯи полиси Бадахшон гуфт, ки чаҳор мавқеи дигари «Толибон» забт карда шуданд ва ҷасадҳои ҷангиёни гурӯҳ дар ҷои ҳодиса монданд.

Ба гуфтаи Рӯҳонӣ, дар ин амалиёт ба «Толибон» талафоти «сангин» ворид шудааст,  аз ҷумла Ҷумъа фармондеҳи кулли низомии «Толибон» дар Дарвоз кушта шудаааст.

Сухангӯи полиси Бадахшон гуфт, ки амалиёт таҳти фармони Муҳаммад Содиқ Муродӣ, сардори идораи полиси вилояти Бадахшон, сурат гирифтааст.

Вай афзуд, ки амалиёт ба далели боронгариҳои шадид мутаваққиф шудааст, аммо покории рустоҳо идома хоҳад ёфт.