ДУШАНБЕ, 14.04.2021 /АМИТ «Ховар»/. Намояндагони Россия, Тоҷикистон, ИМА, Иттиҳоди Аврупо, НАТО, Созмони Ҳамкории Исломӣ (СҲИ) ва якчанд кишварҳои дигар ҷиҳати ширкат дар конфронс оид ба  Афғонистон даъват шудаанд. Тавре АМИТ «Ховар» хабар медиҳад, дар ин хусус дирӯз, 13 апрел ТАСС иттилоъ додааст. Ин чорабинӣ, ки бо ибтикори СММ, Туркия ва Қатар ташкил шудааст, аз 24 апрел то 4 май дар Истанбул баргузор мешавад.

«Даъватномаҳо ба Австрия, Озарбойҷон, Канада, Чин, Франсия, Германия, Ҳиндустон, Индонезия, Эрон, Италия, Япония, Қазоқистон, Қирғизистон, Норвегия, Британияи Кабир, ИМА, Ӯзбекистон, Покистон, Тоҷикистон, Туркманистон, намояндаи олии Иттиҳоди Аврупо, дабири кулли НАТО ва дабири кулли СҲИ фиристода шудаанд», — гуфт мусоҳиби агентӣ.

Намояндаи расмии Дабири кулли СММ Стефан Дюжаррик иттилоъ додааст, ки роҳбари ташкилоти ҷаҳонӣ Антонио Гутерриш ният дорад, ки дар ин чорабинӣ дар шакли видеоӣ ширкат варзад.

Тавре ки Вазорати корҳои хориҷии Туркия пештар хабар дода буд, конфронс оид ба ҳалли мусолиматомез дар Афғонистон бо иштироки намояндагони Ҷумҳурии Исломии Афғонистон ва ҳаракати [радикалии] «Толибон» (дар ҳудуди Тоҷикистон, Россия ва якчанд кишварҳои дигар мамнӯъ шудааст — эзоҳи АМИТ «Ховар») баргузор мешавад. Онҳо таъкид карданд, ки «ҳадафи асосии Конфронси Истанбул оид ба раванди сулҳ дар Афғонистон — суръат бахшидан ва такмил додани музокироти ҷории дохилии Афғонистон дар Давҳа ҷиҳати ноил шудан ба танзими одилона ва суботи сиёсӣ мебошад».

                                                                   АКСИ: Vzglyad.az