Ҷавонони Кумитаи ҳифзи муҳити зист барои бартарафсозии оқибатҳои офати табиӣ дар Вахш кумак расониданд

ДУШАНБЕ, 24.05.2021 /АМИТ «Ховар»/. Гурӯҳи калони ихтиёриён аз ҳисоби ҷавонон, иборат аз 40 нафар аз Кумитаи ҳифзи муҳити зисти назди Ҳукумати Ҷумҳурии Тоҷикистон ва Раёсати  ҳифзи муҳити зисти вилояти Хатлон дар пайи амалигардонии супориши Президенти Ҷумҳурии Тоҷикистон муҳтарам Эмомалӣ Раҳмон   бо мақсади кумак дар бартараф кардани оқибатҳои офати табиӣ ба ноҳияи Вахши вилояти Хатлон сафар намуданд. Дар ин бора ба АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон хабар медиҳад.

Ихтиёриёни Кумитаи ҳифзи муҳити зист барои тоза кардани манзилҳои истиқоматии сокинони  аз офати табиӣ зарардида аз лойқа ва чӯбу хиштҳо ёрии беғаразона расониданд.

Ёдовар мешавем, ки дар натиҷаи бориши боронҳои пай дар пайи шадид 11 -13 май дар якчанд ноҳияҳои вилояти Хатлон ва ноҳияҳои тобеи марказ сел омад, ки дар натиҷа сабаби вайроншавии манзилҳои истиқоматӣ ва шусташавии роҳҳои мошингард гардид.

Акс аз Кумитаи ҳифзи муҳити зисти назди Ҳукумати ҶТ