Президенти мамлакат Эмомалӣ Раҳмон Беморхонаи вилоятии бемориҳои сироятиро дар ноҳияи Данғара ба истифода доданд

Июнь 16, 2021 17:00

ДУШАНБЕ, 16.06.2021 /АМИТ «Ховар»/. 16 июн Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар кӯчаи Мирзо Турсунзодаи маркази ноҳияи Данғараи вилояти Хатлон бинои Беморхонаи вилоятии бемориҳои сироятиро, ки бо тарҳи муосир бунёд шудааст, ба истифода доданд.

Бинои беморхонаи сироятӣ бо мақсади дар сатҳи баланд истиқбол гирифтани ҷашни 30-солагии Истиқлоли давлатии Ҷумҳурии Тоҷикистон сохта шуда, аз 5 ошёна иборат аст.

Корҳои сохтмонӣ дар муддати кӯтоҳ бо заҳмати софдилонаи мутахассисону сохтмончиёни ватанӣ бо сифати баланд ва тибқи стандартҳои меъмории муосир анҷом ёфта, мавриди баҳрабардорӣ қарор дода шуд.

Тибқи лоиҳа Беморхонаи вилоятии бемориҳои сироятӣ дар ноҳияи Данғара дорои 200 кат буда, барои ташхису табобат ва баланд бардоштани сатҳу сифати хизматрасонии тиббӣ ба аҳолӣ шароиту имкониятҳои васеъ фароҳам аст.

Ошёнаи якуми беморхона 18 ҳуҷраи корӣ дошта, дар он шуъбаи қабул, ҳуҷраҳои функсионалӣ, шуъбаҳои эҳёгарӣ, ҷарроҳӣ ва паразитологӣ, ҷойгир мебошанд. Дар ошёнаи дуюм 19 ҳуҷраи корию ташхисӣ, шуъбаҳои табобатӣ, кӯдакона, ки бо дастгоҳу таҷҳизоти пешрафтаи тиббӣ муҷаҳҳаз гардонда шудаанд, бунёд шудааст.

Бинои беморхонаи вилоятии бемориҳои сироятӣ дар ноҳияи Данғара бо дастуру супоришҳои бевоситаи Президенти мамлакат дар давраи пандемияи бемории сироятии Ковид-19 бунёд гардида, барои саривақт табобат кардани маризоне, ки ба бемориҳои гуногуни сироятӣ гирифтор шудаанд, шароити муосир фароҳам омад.

Ошёнаи чоруми беморхона аз 29 ҳуҷра иборат буда, дар он бемориҳои зардпарвин ва касалиҳои сироятии махсусан хафнок табобат карда мешавад. Дар маҷмуъ беморхонаи вилоятии бемориҳои сироятӣ дорои қариб 120 ҳуҷра барои беморон мебошад.

Дар асоси лоиҳа дар ошёнаи панҷум кафедраи бемориҳои сироятии Донишгоҳи давлатии тиббии Хатлон ҷойгир буда, бо тамоми дастгоҳу лавозимоти таҳсил таъмин мебошад. Дар беморхонаи мазкур табибони соҳибтаҷриба ба кор ҷалб карда шуда, аз ин пас онҳо, донишу таҷрибаи андӯхтаи хешро самаранок истифода мебаранд ва беморонро саривақт табобат мекунанд. Дар оянда дар ин беморхона табибони ҷавони донишманду лаёқатманд аз ҳисоби хатмкунандагони Донишгоҳи давлатии Хатлон ба кор ҷалб карда мешаванд.

Ҳангоми боздиди Пешвои миллат аз беморхона, табибон ба Роҳбари давлат муҳтарам Эмомалӣ Раҳмон барои ғамхориҳои ҳамешагиашон нисбат ба кормандони соҳаи тиб, махсусан дар шароити пандемияи ҷаҳонӣ изҳори сипосу миннатдорӣ намуданд.

Президенти мамлакат муҳтарам Эмомалӣ Раҳмон аз табибон даъват ба амал оварданд, ки ҳангоми фаъолият, бо беморон пеш аз ҳама хушмуомила бошанд, зеро бемор бештар аз дигарон ба муомила ва сухани хуб муҳтоҷ аст, яъне табиб ҳам бо дорую дармон ва ҳам бо рафтору гуфтор шахси беморро муолиҷа ва табобат мекунад.

Акнун табибон бо истифода аз таҷҳизоти пешрафтаи тиббӣ, ки дар ин ҷо бо дастгирии Ҳукумати мамлакат муҳайё гардидааст, фаъолияти худро дуруст ба роҳ монда, ба мардум хизмати бо сифати тиббӣ мерасонанд.

Мавриди баҳрабардорӣ қарор гирифтани беморхонаи махсусгардонидашудаи сироятӣ, дар оянда кори табибонро ҷиҳати пешгирӣ, муоина ва муолиҷаи маризиҳои хавфноки сироятӣ боз ҳам босамар хоҳад кард.

Бо дастгирии ҳамаҷонибаи Ҳукумати мамлакат ва амалисозии барномаҳои миллӣ соҳаи тандурустӣ дар ҷумҳурӣ ба хусус дар ноҳияи Данғараи вилояти Хатлон рушду пешрафт карда, дар натиҷа сатҳу сифати хизматрасонии тиббӣ ба аҳолӣ беҳтар гардид, ки яке аз ҳадафҳои афзалиятноки давлат ба шумор меравад.

Дар арафаи таҷлили 30-солагии Истиқлоли давлатии Ҷумҳурии Тоҷикистон ба фаъолият оғоз кардани муассисаи нави тиббии имрӯза тӯҳфаи арзандаи Ҳукумати кишвар ба кормандони соҳаи тандурустии ноҳии Данғара мебошад.

Ифтитоҳи Беморхонаи вилоятии бемориҳои сироятӣ дар ноҳияи Данғара 16.06.2021

Июнь 16, 2021 17:00

Хабарҳои дигари ин бахш

Сарвари давлат Эмомалӣ Раҳмон дар интихоботи даъвати нави вакилони Маҷлиси намояндагон ва маҷлисҳои маҳаллии вакилони халқ иштирок намуданд
Маҷлиси Ҳукумати Ҷумҳурии Тоҷикистон баргузор шуд
Паёми шодбошии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба муносибати фарорасии моҳи шарифи Рамазон
Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Беларус Александр Лукашенко суҳбати телефонӣ анҷом доданд
35-СОЛАГИИ ИСТИҚЛОЛИ ДАВЛАТӢ. Дар шаҳри Кӯлоб 494 иншоот ба истифода дода мешавад
Имрӯз таҳти раёсати Президенти Ҷумҳурии Тоҷикистон Эмомалӣ Раҳмон ҷаласаи Шурои амният баргузор гардид
Суҳбати телефонии Президенти Ҷумҳурии Тоҷикистон Эмомалӣ Раҳмон бо Президенти Федератсияи Русия Владимир Путин
35-СОЛАГИИ ИСТИҚЛОЛИ ДАВЛАТӢ. Сокинони Ҷамоати деҳоти Навободи шаҳри Ҳисор чойхона бунёд намуданд
35-СОЛАГИИ ИСТИҚЛОЛИ ДАВЛАТӢ. Дар шаҳри Хуҷанд бинои иловагии гимназияи №4 бунёд карда мешавад
Дар шаҳри Конибодом сохтмони се кӯдакистон оғоз гардид
Сарвари давлат Эмомалӣ Раҳмон дар паради ҳарбӣ ба муносибати 32-солагии таъсиси Қувваҳои Мусаллаҳи Ҷумҳурии Тоҷикистон иштирок намуданд
Суханронии Президенти Ҷумҳурии Тоҷикистон муҳтарам Эмомалӣ Раҳмон дар Паради ҳарбӣ ба муносибати 32-солагии таъсисёбии Қувваҳои Мусаллаҳ