Дар Ворух синфхонаҳои нави таълимӣ барои омӯзиши барномаҳои компютерӣ ва дузандагӣ ба фаъолият оғоз намуданд

ДУШАНБЕ, 27.06.2021 /АМИТ «Ховар»/. Дар ҷамоати деҳоти Ворухи шаҳри Исфара ду синфхонаи нави таълимӣ барои омӯзиши барномаҳои компютерӣ ва дузандагӣ дар заминаи инфрасохтори намояндагии филиали Маркази таълими калонсолони Тоҷикистон бунёд гардида, аз ҷониби Агентии меҳнат ва шуғли аҳолии Вазорати меҳнат, муҳоҷират ва шуғли аҳолии Ҷумҳурии Тоҷикистон ҳар синфхона бо 10 мошинаи дӯзандагӣ ва 10 дастгоҳи компютерии муосир таъмин карда шудаанд.  Дар заминаи ин синфхонаҳо имкон дорад, ки дар ду баст то 80 нафар хоҳишмандон аз ҳисоби аҳолии бекор ва бекасб ба касбомӯзӣ фаро гирифта шаванд.

Тавре аз Вазорати меҳнат, муҳоҷират ва шуғли аҳолии Ҷумҳурии Тоҷикистон ба АМИТ «Ховар» иттилоъ доданд, ки дар ҷараёни  ифтитоҳи синфхонаҳои таълимӣ муовини якуми Вазири меҳнат, муҳоҷират ва шуғли аҳолии Ҷумҳурии Тоҷикистон Абдуғаффор Раҳмонзода ва  муовини якуми Раиси вилояти Суғд, раиси шаҳри Исфара ва дигар намояндагони мақомоти дахлдор  иштирок намуданд.

Муовини якуми Вазири меҳнат, муҳоҷират ва шуғли аҳолии Ҷумҳурии Тоҷикистон Абдуғаффор Раҳмонзода иброз намуд, ки «ташкил намудани чунин синфхонаҳо дар партави сиёсати Президенти мамлакат ва дар доираи нақша – чорабиниҳо аз натиҷаи сафари Вазири меҳнат, муҳоҷират ва шуғли аҳолии Ҷумҳурии Тоҷикистон ба минтақаи Ворух амалӣ гардида, ин иқдом барои ҳарчи бештару беҳтар омӯхтани ихтисосҳои муосир, ба касбомӯзӣ ҷалб намудани сокинон ва дар ин замина таъмин намудани бозори меҳнат бо мутахассисони касбӣ мусоидат менамояд».

АКС: Вазорати меҳнат, муҳоҷират ва шуғли аҳолии Ҷумҳурии Тоҷикистон