ДУШАНБЕ, 17.06.2021 /АМИТ «Ховар/. Бемории Covid-19 ҳанӯз ҳам чун хатар дар ҷомеаи ҷаҳонӣ бо гузашти қариб ду сол боқӣ мондааст. Бо вуҷуди он ки дар бисёр кишварҳо бар муқобили ин вирус бо роҳҳои гуногун мубориза мебаранд, аммо имрӯзҳо хавфи он аз байн нарафтааст.

Мутахассисон бар он андеша ҳастанд, ки мубориза бо ин гуна беморӣ пеш аз ҳама аз шахс эҳтиёткориву риояи қоидаҳои беҳдоштиро талаб мекунад. Андаке фориғболӣ ҷиҳати нодида гирифтани ин вирус метавонад оқибати нохуш дар пай дошта бошад. Тавсия шудааст, ки истифодаи ниқоб, риояи гигиенаи шахсӣ, аз ҷумла бо собун шустани дастон ҳамарӯза бояд як ҷузъи фаъолияти мо бошад. Дар он ҷое, ки издиҳоми мардуми зиёд аст, бахусус дар ҷамъомадҳо ва дохили мусофиркашҳо тавсия дода мешавад, ки ҳатман аз ниқоб  истифода бурд. Ин вирус, тавре ки ҳамагон шоҳидем, сарҳад надорад. Он метавонад бо роҳи ҳавоӣ паҳн шавад.

Ин матлабро сарвари Пажӯҳишгоҳи байналмилалии тандурустӣ ва тадқиқотии Ню-Йорк (ИМА) доктор Ораш Алоӣ зимни суҳбат дар   барномаи «Дармон»-и Радиои «Ховар» баён намуд.

Чӣ бояд кард, ки кас  аз хатари Covid-19 эмин монад ва саломатии худу наздиконашро ҳифз намояд?,  Ва ё бо ваксина фаро гирифтани шаҳрвандон бар зидди ин беморӣ то чӣ андоза сабарабахш аст?

Ораш Алоӣ дар барномаи мазкур  ба ин ва дигар саволҳои марбут ба бемории Covid-19 посух мегӯяд.

Шумо метавонед ин барномаро имрӯз, 17.06.2021 соати 09:30 (асл)  инчунин  такроран соатҳои 17:30 ва 21:30 дар пешниҳоди муҳаррир ва масъули барнома Нарзулло Ализода аз мавҷи Радиои «Ховар»  101,5  FM   бишнавед.