COVID-19: Ба зиёда аз 480 ҳазор гурӯҳҳои осебпазири ҷомеа пардохти кумакпулии якдафъаина пешбинӣ гардидааст
ДУШАНБЕ, 20.07.2021 /АМИТ «Ховар»/. Дар давраи паҳншавии бемории сироятии COVID-19 тибқи қарори дахлдори Ҳукумати Ҷумҳурии Тоҷикистон ба зиёда аз 480 ҳазор гурӯҳҳои гуногуни осебпазири ҷомеа пардохти кумакпулии якдафъаина ба андозаи 400 сомонӣ пешбинӣ гардида, то имрӯз аз ҷониби Вазорати тандурустӣ ва ҳифзи иҷтимоии аҳолии мамлакат ба 149 ҳазору 856 нафар оилаҳои камбизоати шарҳу ноҳияи ҷумҳурӣ он пардохт шуд. Дар ин бора муовини Вазири тандурустӣ ва ҳифзи иҷтимоии аҳолии Ҷумҳурии Тоҷикистон Шодихон Ҷамшед ба АМИТ «Ховар» иттилоъ дод.
Ба зикри мавсуф, бо дастгирии бевоситаи Пешвои миллат Созишномаи байни Ҷумҳурии Тоҷикистон ва Ассотсиатсияи Байналмилалии Рушд аз 31 майи соли 2021 (гранти №D777-TJ) «Оид ба маблағгузории дуюми иловагӣ барои «Лоиҳаи фавқулоддаи муқовимат ба вируси COVID-19 дар Ҷумҳурии Тоҷикистон» ба имзо расонида шуд. Илова ба ин, Дастурамал дар бораи таъйин, маблағгузорӣ ва пардохти кумакпулии якдафъаинаи иҷтимоӣ ба хонаводаҳо (оилаҳо)-и камбизоат аз ҷониби вазорат дар ҳамҷоягӣ бо кормандони «Лоиҳаи фавқулоддаи муқовимат ба вируси COVID-19 дар Ҷумҳурии Тоҷикистон» таҳия гардида, аз ҷониби Вазорати тандурустӣ ва ҳифзи иҷтимоии аҳолии Ҷумҳурии Тоҷикистон тасдиқ шуд. Инчунин он бо Вазорати молияи Ҷумҳурии Тоҷикистон ва Агентии омори назди Президенти Ҷумҳурии Тоҷикистон мувофиқа гардида, барои корбарӣ ба Агентии давлатии ҳифзи иҷтимоии аҳолӣ ирсол гардид.
«Тибқи Созишномаи маблағгузорӣ ба кумакпулии якдафъаинаи иҷтимоӣ оилаҳои камбизоате, ки дар ҳайати худ кӯдакони то 7-сола доранд, хонаводаҳое, ки тибқи ҳуҷҷати дахлдори мақомоти худидораи маҳаллӣ занҳо сардори оила эътироф гардида, дар ҳайати худ кӯдакони аз 7 то 16-сола доранд, ҳуқуқи гирифтани кумакпулии иҷтимоии якдафъаина доранд.
Оилаҳои камбизоат, ки кӯдаконашон шаҳодатномаи таваллуд ва ё ҳуҷҷати тасдиқкунандаи маъюбӣ надоранд, барои ба кумакпулии якдафъаинаи иҷтимоӣ ҳуқуқ пайдо намудан бояд ба мақомоти ваколатдори давлатӣ муроҷиат намуда, шаҳодатномаи таваллуд ё ҳуҷҷати маъюбиро гирифта, барои ворид намудан ба махзани ягонаи иттилоотии барнома ба мақомоти маҳаллии ҳифзи иҷтимоии аҳолӣ пешниҳод намоянд»,- гуфт Шодихон Ҷамшед.
Хонаводаҳои дорои кӯдакони хурдсоли то 3-сола, ки дар марҳилаи якуми татбиқи Лоиҳаи ТЕС-19 (аз моҳи июни соли 2020 то моҳи апрели соли 2021) кумакпулии якдафъаинаи иҷтимоӣ гирифтанд, дар доираи Созишномаи маблағгузорӣ ҳуқуқи такроран (дубора) гирифтани чунин кумакпулиро надоранд.
Дар Тоҷикистон ҷарроҳии мураккаби мағзи сар гузаронида шуд
Дурнамои рушди соҳаи таҳсилоти ибтидоӣ ва миёнаи касбӣ дар Тоҷикистон бо намояндагони Ассотсиатсияи кумак ва ёрии Ҷопон баррасӣ гардид
Ҳайати ҳокимияти судии Тоҷикистон дар Женева дар форуми байналмилалӣ иштирок намуд
«СОЛИМИИ ЗАН — СОЛИМИИ МИЛЛАТ». Дар шаҳри Гулистон беш аз 200 нафар занон бо муоинаи ройгон фаро гирифта шуданд
Дар Душанбе оид ба таҳкими ҳамкории минтақавӣ дар самти коҳиши хавфи офатҳо вохӯрӣ доир шуд
Маркази тадқиқоти стратегии Тоҷикистон бо Институти осиёии дипломатия ва муносибатҳои байналмилалии Непал Ёддошти тафоҳум ба имзо расонид
Муовини Сарвазири Тоҷикистон дар Конфронси минтақавии сатҳи баланд вобаста ба пешгирии зӯроварӣ нисбат ба кӯдакон иштирок намуд
Густариши ҳамкорӣ дар самти татбиқи системаҳои рақамӣ дар раванди таълим бо намояндагони Бунёди аврупоии маориф баррасӣ шуд
Дар муассисаҳои кумаки аввалини тиббию санитарии Тоҷикистон шакли намунавӣ амалӣ мегардад
ИМРӮЗ — РӮЗИ БАЙНАЛМИЛАЛИИ ЗАНОНИ ДЕҲОТ. Фаъолияти Раҳима Салимова дар деҳа намунаи ибрат аст
Маркази тадқиқоти стратегии Тоҷикистон ва Гурӯҳи муассисаҳои MERI-и Ҳиндустон ҳамкориро тақвият мебахшанд
РӮЗИ ҶАҲОНИИ КОҲИШИ ХАТАРИ ОФАТҲОИ ТАБИӢ. Барои пешгирӣ аз пайомадҳои офатҳои табиӣ шаҳрвандон низ бояд масъулиятшинос бошанд.
