Тавоноии умумии неругоҳҳои барқи обии «Норак», «Сарбанд» ва «Қайроққум» баъди таҷдид 374 МВт меафзояд,- бардошт аз нишасти матбуотӣ

ДУШАНБЕ, 12.07.2021 /АМИТ «Ховар»/.  Вазорати энергетика ва захираҳои оби Ҷумҳурии Тоҷикистон бо дастгирии Ҳукумати мамлакат дар баробари бунёди неругоҳҳои барқи обии нав ба масъалаи барқарор намудани  иқтидорҳои мавҷуда таваҷҷуҳи хосса зоҳир менамояд. Ҳоло таҷдиди неругоҳҳои барқи обии «Норак», «Сарбанд» ва «Қайроққум» идома дошта, баъди таҷдиди пурра тавоноии умумии ин се неругоҳ нисбат ба тавоноии воқеии имрўзаи онҳо ба андозаи 374 МВт. афзоиш хоҳад ёфт. Дар ин бора имрӯз зимни нишасти матбуотӣ Вазири энергетика ва захираҳои оби Ҷумҳурии Тоҷикистон Далер Ҷумъа ба намояндагони воситаҳои ахбори омма иттилоъ дод.

Ба зикри мавсуф, вазорат фаъолияташро дар самти тарҳрезӣ, идоракунӣ ва татбиқи лоиҳаҳои сармоягузорӣ дар соҳаҳои энергетика ва захираҳои об тақвият бахшидааст. Аз ҷумла, 12 лоиҳаи давлатии сармоягузории соҳаи электроэнергетика, аз қабили «Марҳилаи якуми таҷдиди Неругоҳи барқи обии Норак», «Таҷдиди НБО-и Сарбанд», «Таҷдиди НБО-и Қайроққум», «Лоиҳаи минтақавии хати интиқоли барқи CASA-1000», «Барномаи солимгардонии вазъи молиявии ширкати энергетикӣ», «Ҷорӣ намудани системаи ҳисоби яклухти интиқоли неруи барқ ва беҳдошти шабакаҳои интиқоли барқ», «Кам намудани талафоти неруи барқ дар вилояти Хатлон» (шаҳрҳои Кўлоб ва Бохтар), «Лоиҳаи рушди соҳаи энергетика» (Кам намудани талафоти неруи барқ дар шаҳрҳои Душанбе, Панҷакент, Истаравшан, Исфара, Конибодом, Бӯстон ва ноҳияи Данғара»), «Азнавпайвастшавӣ ба низоми энергетикии Осиёи Марказӣ», «Барномаи дастгирии ҷомеаҳо», «Электрофикатсияи деҳот» (қисмати вилояти Хатлон) ва «Сохтмони шабакаҳои барқӣ дар Ромит» дар марҳилаи татбиқ қарор доранд. Дар маҷмӯъ, дар доираи лоиҳаҳои зикршуда дар ҳаҷми 1,3 млрд. доллари ИМА маблағ ҷалб карда шудааст.

Илова бар ин, татбиқи 7 лоиҳаи дигар дар ҳудуди Вилояти Мухтори Кӯҳистони Бадахшон, аз ҷумла лоиҳаҳои «Сохтмони Неругоҳи барқи обии Себзор», «Электрофикатсияи деҳот», «Бунёди хати интиқоли барқи 110 кВ Хоруғ-Шуғнон» – марҳилаи 1, «Бунёди хати интиқоли барқи 110 кВ Хоруғ-Шуғнон» – марҳилаи 2, «Марҳилаи ҳафтуми лоиҳаи Шуғнон ё худ ҷорӣ намудани низоми электронии пардохти ҳаққи неруи барқ», лоиҳаи «Бунёди хати интиқоли барқи 110 кВ барои пайвасткунии Дарвоз-Ванҷ ба шабакаҳои асосии ширкати Помир Энерҷӣ», Лоиҳаи  хусусии  энергетикии  Помир, марҳилаи 3  бо маблағи умумии 96,9  млн. доллари ИМА идома дорад.