АМА ба 5000 шаҳрванди Афғонистон паноҳгоҳи муваққатӣ медиҳад

ДУШАНБЕ, 23.08.2021 /АМИТ «Ховар»/. Амороти Муттаҳидаи Арабӣ розӣ шудааст, ки бо дархости Иёлоти Муттаҳидаи Амрико 5000 шаҳрванди Афғонистонро муваққатан қабул кунад. Тавре АМИТ «Ховар» бо истинод ба ТАСС хабар медиҳад, дар ин бора аз Вазорати корҳои хориҷии Амороти Муттаҳидаи Араб хабар доданд. 

«Рӯзҳои  наздик тахлияшудагон аз Кобул ба Амороти Муттаҳидаи Араб интиқол дода мешаванд», — гуфтанд дар вазорат.

Вазорати корҳои хориҷии Амороти Муттаҳидаи Араб ба хабаргузории Reuters гуфтааст, ки паноҳандагон дар ин кишвар 10 рӯз хоҳанд монд. 

Ба куҷо ва кай ин одамон аз Амороти Муттаҳидаи Араб бароварда хоҳанд шуд, мушаххас нашудааст. Ҳоло Иёлоти Муттаҳидаи Амрико музокиротро бо якчанд кишварҳо дар масъалаи қабули паноҳандагони афғон идома медиҳад.

Президенти Амрико Ҷо Байден рӯзи ҷумъа гуфт, ки Амрико аз 14 август инҷониб тақрибан 13 ҳазор нафарро аз Афғонистон тахлия кардааст. Миёни онҳо низомиён ва ғайринизомиёни Иёлоти Муттаҳида ва дигар давлатҳо, аз ҷумла афғонҳое, ки аз Толибон гурехтаанд, ҳастанд.

Қаблан Колумбия низ омодагии худро барои додани паноҳгоҳи муваққатӣ ба паноҳандагони Афғонистон  эълон карда буд.                                                  

АКС аз манбаъҳои боз