Роҳбари муқовимати Афғонистон интизор аст, ки Русия дар ташкили музокирот бо Толибон кумак кунад

ДУШАНБЕ, 26.08.2021 /АМИТ «Ховар»/. Роҳбари ҷабҳаи муқовимат бо толибон дар вилояти Панҷшер Аҳмад Масъуд (ДАР СУРАТ) бар ин назар аст, ки Русия метавонад дар гуфтушуниди намояндагони ҷабҳаи муқовимат бо «Толибон»* кумак ва ба ин восита аз авҷ гирифтани зӯроварӣ пешгирӣ кунад. Ба иттилои АМИТ «Ховар», Масъуд дар ин бора дар мусоҳиба бо РБК дирӯз, 25 август изҳори назар кардааст.

Ба қавли роҳбари муқовимат, Москва метавонад дар баргузории «чизе ба монанди музокироти осоиштаи фаврӣ миёни мо ва «Толибон»* кумак кунад ва онҳоро бовар кунонад, ки ба он биёянд».

Тавре дирӯз АМИТ «Ховар» хабар дод, Президенти Тоҷикистон Эмомалӣ Раҳмон дирӯз дар Душанбе Вазири корҳои хориҷии Покистон Маҳмуд Курейширо ба ҳузур пазируфтанд. Ҳангоми суҳбат бо ӯ, Пешвои Тоҷикистон мавқеи давлати худро иброз дошта, изҳор намуданд, ки «барои ҳалли фаврии мушкилоти амнияти сиёсии кишвари ҳамсоя (Афғонистон – тавзеҳи АМИТ «Ховар»), ҳукумати фарогир бо иштироки ҳамаи ақаллияти миллӣ, аз ҷумла тоҷикони Афғонистон, ки беш аз 46% аҳолии ин кишварро ташкил медиҳанд, бояд ташкил карда шавад».

Масъуд изҳори нигаронӣ кард, ки таъсиси ҳукумат танҳо аз сӯи толибон боиси он хоҳад шуд, ки Афғонистон дар инзиво қарор бигирад ва мардум наметавонанд бо якдигар дар дохили кишвар ва берун аз он зиндагии осоишта дошта бошанд.

«Мутаассифона, амали «Толибон»* аллакай нишон медиҳад, ки онҳо хостори фарогирӣ, таҳаммулпазирӣ, ҳуқуқи инсон ва занон набуда,  ба арзишҳои демократӣ шарик нестанд. Ҳамаи  ин чизҳоеанд, ки барои ҷомеаи байналмилалӣ муҳим буда, аз ҷониби ҳукумат бояд эътироф карда шаванд. Ва ин барои мо мушкил аст, мо наметавонем онро қабул кунем», — афзуд ӯ.

                                                      АКС: imag.one

___________________________________

* «Толибон» ҳаракатест, ки дар Тоҷикистон, Русия ва якчанд  давлати дигар мамнӯъ аст.