«Хизмат ба Ватан шараф аст». Таҳти чунин унвон дар Душанбе Форуми ҷумҳуриявии хизматчиёни ҳарбӣ доир гардид

ДУШАНБЕ, 02.09.2021 /АМИТ «Ховар»/. Имрӯз бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо мақомоти қудратии мамлакат бахшида ба 30- солагии Истиқлоли давлатии Ҷумҳурии Тоҷикистон Форуми ҷумҳуриявии хизматчиёни ҳарбӣ доир гардид, ки ҳадафи асосии он баланд бардоштани тарбияи ватандӯстии ҷавонон  ва ҷалби онҳо ба сафи Қувваҳои Мусаллаҳи мамлакат мебошад, иттилоъ доданд аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба АМИТ «Ховар».

Дар форуми мазкур раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Абдулло Раҳмонзода сухан гуфта, саҳми хизматчиёни ҳарбиро дар таҳкими сулҳу суботи сартосарӣ дар даврони соҳибистиқлолии давлат баланд арзёбӣ намуд.

Мавсуф зикр намуд, ки бо ғамхориҳои пайвастаи давлату Ҳукумати мамлакат зери роҳбарии Сарфармондеҳи Олии Қувваҳои Мусаллаҳи Ҷумҳурии Тоҷикистон, Пешвои муаззами миллат муҳтарам Эмомалӣ Раҳмон, айни замон Артиши миллӣ қодир аст амнияти давлату миллат ва ҳифзи марзу буми кишварамонро пурра таъмин намояд. Зеро, қудрату тавоноӣ ва омодагии комили Қувваҳои Мусаллаҳ дар ҳимоя, пешгирӣ ва мубориза бар зидди ҳама гуна хавфу хатар ва таҳдидҳо ҳам дар амал ва ҳам дар машқҳои низомӣ борҳо собит гаштааст. Хизматчиёни ҳарбию ҳайати шахсии ҷузъу томҳои Қувваҳои мусаллаҳ дар даврони соҳибистиқлолии мамлакат дар ҳама лаҳзаҳои душвор ҷасорату мардонагӣ ва садоқат ба савганди ҳарбӣ нишон дода, барои ҳифзи сарзамин ва дастовардҳои истиқлол, пойдории сулҳу субот ва сохтори конститутсионӣ, омодагӣ ба ҳифзи Ватан ва ҷони худро дар роҳи Ватан нисор кардан тайёр буданашонро исбот кардаанд

Ҳамчунин дар кори Форум аз ҷониби намояндагони вазорату идораҳо, афсарону сарбозони ҷузъу томҳои Қувваҳои Мусаллаҳи Ҷумҳурии Тоҷикистон маърӯзаҳо пешниҳод гардиданд.

Зикр гардид, ки барои насли ояндасози мамлакат хизмат дар сафи Қувваҳои Мусаллаҳи мамлакат муҳимтарин мактаби обутоби ҳаётӣ мебошад. Маҳз дар ҳамин ҷо ҷавонписарон сабақи шуҷоату мардонагӣ гирифта, муҳофизат кардани хоки поки Ватанро меомӯзанд. Хизмат кардан ба Ватан аслан хизмат кардан ба падару модар, барои некӯаҳволии фарзандон ва ободии рӯзгори худи инсон аст.

Дар ҷамъбаст ба якчанд нафар иштирокчиёни фаъоли форум аз ҷониби раиси Кумита сипосномаҳои Кумитаи кор бо ҷавонон ва варзиш супорида шуд.

АКС аз Кумитаи кор бо ҷавонон ва варзиши назди Ҳукумати ҶТ