Лавров: муҳимтарин чиз барои Русия таъмини амният дар Осиёи Марказист

ДУШАНБЕ, 02.09.2021 /АМИТ«Ховар»/. Вазири корҳои хориҷии Русия Сергей Лавров 1 сентябр дар назди донишҷӯён ва устодони МГИМО суханронӣ карда, дар бораи кори муштарак барои ҳалли вазъ дар Афғонистон сухан ронд, менависад Sputnik. 

Вай зикр намуд, ки Русия бо ҷумҳуриҳои Осиёи Марказӣ ҳамкории зич мекунад. Лавров афзуд, ки пас аз хуруҷи неруҳои ИМА ва СААШ аз Афғонистон муҳимтарин чиз барои Русия- ин таъмини амнияти муттаҳидон, кишварҳои Осиёи Марказист.

Дипломат гуфтааст, ки амнияти марзҳои ҷанубии Русия мустақиман аз ин вобаста аст.

Вазири корҳои хориҷии Русия гуфт: «Ман умедворам, ки дар якҷоягӣ мо метавонем дар бораи чунин иқдомҳои беруна ба мувофиқа бирасем, ки барои фароҳам овардани шароит дар дохили Афғонистон ва ташаккули раҳбарияти воқеан миллӣ мусоидат кунанд».

Сергей Лавров таъкид кард, ки дар ин самт корҳои муштараки фаъол сурат мегиранд.  

ДАР АКС: © Хадамоти матбуоти Вазорати корҳои хориҷии Федератсияи Русия