Маҳсулоти нассоҷии ширкатҳои Тоҷикистон дар Намоишгоҳи комёбиҳои хоҷагии халқи шаҳри Москва муаррифӣ мешавад

ДУШАНБЕ, 21.09.2021 /АМИТ «Ховар»/. Аз 21то 24 сентябр  дар павилонҳои №55 ва 57-и Намоишгоҳи комёбиҳои хоҷагии халқи шаҳри Москва ярмаркаи  56-уми  федералии яклухти молу таҷҳизоти нассоҷӣ ва саноати сабуки «Текстиллегпром»  баргузор мегардад.Дар ярмаркаи мазкур зиёда аз 350 ширкат аз 28 минтақаи Русия ва 20 давлати ҷаҳон: Италия, Олмон, Туркия, Ҳиндустон, Беларус, Лаҳистон, Тоҷикистон ва Узбекистон иштрок намуда,  молу маҳсулоти худро муаррифӣ менамоянд, иттилоъ доданд ба АМИТ “Ховар” аз Вазорати саноат ва технологияҳои нави Ҷумҳурии Тоҷикистон.

Тоҷикистонро дар ин намоишгоҳи байналмилалӣ 10 ширкати ватанӣ: ҶСК «Гулистони Душанбе», ҶДММ «КоТа Глобал», ҶДММ «Меҳровари Қурғонтеппа», ҶДММ «Нассоҷи Хуҷанд», ҶДММ «Ноҳид», ҶДММ «Ортекс», СИ «Раҳматов», СИ «Раҳматов»,  ҶДММ «ТоҷТекс» ва ҶДММ «Ваҳдат Текстайл» намояндагӣ намуда, маҳсулоти худ- ҷинсҳои мардонаву занона, либоси варзишӣ, либоси кории махсус, либоси низомӣ, либосҳои мардонаву занона, таҳпӯшҳои мардонаву кӯдакона, маҳсулоти кешбофӣ, ҷӯроб ва ресмони пахтагинро ба намоиш мегузоранд.

АКС аз ярмаркаи  федералии яклухти «Текстиллегпром»