Намояндаи доимии Афғонистон дар СММ аз Шӯрои Амният даъват намуд, ки толибонро дар Кобул эътироф накунад

ДУШАНБЕ, 10.09.2021 /АМИТ «Ховар»/. Намояндаи доимии Афғонистон дар СММ Ғулом Исакзай дар ҷаласаи Шӯрои Амнияти  созмони байналмилалӣ бо баёнияе баромад карда, даъват намуд, ки ҳукумати нави ин кишварро то он даме, ки «фарогир нашавад», эътироф накунад. Дар ин бора РИА Новости хабар додааст.

Дар изҳороти худ Исакзай таъкид кард, ки «эътирофи ҳама гуна ҳукуматро дар Афғонистон ба таъхир гузоштан лозим аст, то он даме, ки он воқеан фарогир набошад ва дар асоси раъйи озодонаи мардум ташкил нашавад».

Ёдовар мешавем, ҳаракати “Толибон” (як созмони террористӣ, ки дар Тоҷикистон, Русия ва кишварҳои дигар мамнӯъ аст), ки қаблан дар Афғонистон ба қудрат расида буд, талаб кардааст, ки раҳбарони он аз рӯйхати таҳримии СММ ва ИМА хориҷ карда шаванд.

АКС аз Pixabay