Кормандони милитсия ҷиҳати ҳифзи тартиботи ҷамъиятӣ ва бехатарии шаҳрвандон вазифаи худро содиқона иҷро намуданд

ДУШАНБЕ, 18.10.2021. /АМИТ «Ховар»/. 16 октябр дар Вазорати корҳои дохилӣ ҷаласаи ҷамъбасти фаъолияти фаврӣ-хизматии мақомоти корҳои дохилии Ҷумҳурии Тоҷикистон дар 9 моҳи имсол бо иштироки Вазири корҳои дохилӣ Рамазон Раҳимзода, муовинони вазир, сардорони раёсатҳо, шуъбаҳо ва ҷузъу томҳои мақомоти корҳои дохилӣ баргузор гардид.

Тавре аз Вазорати корҳои дохилӣ ба АМИТ «Ховар» хабар доданд, ҷаласаи мазкур тариқи селекторӣ баргузор гардида, кормандони мақомоти корҳои дохилӣ дар шаҳру ноҳияҳо ва вилоятҳои ҷумҳурӣ ба воситаи алоқаи видеоӣ дар он иштирок намуданд.

Рамазон Раҳимзода иброз дошт, ки тамоми ҳайати шахсӣ ва қувваю воситаҳои Вазорати корҳои дохилӣ ва мақомоти таъмини амният ҷиҳати ҳифзи тартиботи ҷамъиятӣ ва бехатарии шаҳрвандон зимни баргузории ҷашни 30-солагии Истиқлолияти давлатии Ҷумҳурии Тоҷикистон, ҷаласаҳои Шӯрои Созмони Ҳамкории Шанхай (СҲШ), Созмони аҳдномаи амнияти дастаҷамъӣ (СААД), ки моҳи сентябри соли равон дар пойтахти мамлакат – шаҳри Душанбе доир гардиданд, ҳамчунин зимни баргузории якчанд чорабиниҳои сиёсӣ-фарҳангӣ ва гузашти низомӣ дар шаҳру ноҳияҳо ва вилоятҳои ҷумҳурӣ ба хизмат сафарбар гардида, вазифаҳои худро содиқона ба ҷой оварданд.

Дар идомаи ҷаласа Вазири корҳои дохилӣ Р.Раҳимзода камбудию норасоиҳои ҷойдоштаро муҳокима намуда, ба тамоми сохторҳои мақомоти корҳои дохилӣ ҷиҳати пурзӯр намудани мубориза бар зидди терроризм, экстремизм, гардиши ғайриқонунии маводи мухаддир, дастгир намудани шахсони дар кофтуков қарордошта, тартибу низом ва бехатарии ҳаракат дар роҳҳои автомобилгард, таъмини амният, оромию осоиштагӣ, пешгирии содиршавии ҷиноятҳо ва дигар ҳуқуқвайронкуниҳо дастуру супоришҳои қатъӣ дод.

Ҳамчунин аз собиқадорони мақомоти корҳои дохилӣ даъват ба амал оварда шуд, ки ба тарбияи кадрҳои ҷавон таваҷҷуҳи хосса зоҳир намоянд.

 АКС: ВКД