Муовини Вазири фарҳанг Давлат Сафарзода: «Новобаста аз дастовардҳо имрӯз дар фаъолияти муассисаҳои фарҳангии Тоҷикистон мушкилот зиёданд»

ДУШАНБЕ, 19.10.2021. /АМИТ «Ховар»/. Баҳри дар сатҳи баланди ташкилию эҷодӣ баргузор намудани Озмунҳои ҷумҳуриявии «Тоҷикистон — Ватани азиз ман» ва «Фурӯғи субҳи доноӣ китоб аст» бояд  тадбирҳои муассир роҳандозӣ намуд. Бояд зимни баргузории ин чорабиниҳо ҷиҳати дарёфти истеъдодҳо ва ҷалби минбаъдаи онҳо ба чорабиниҳои фарҳангии ҷумҳуриявӣ ва давлатӣ, инчунин фаро гирифтани онҳо ба муассисаҳои олӣ ва миёнаи махсуси соҳаи фарҳангу ҳунари ҷумҳурӣ таваҷҷуҳи хосса дода шавад.

Ин матлабро муовини Вазири фарҳанги Ҷумҳурии Тоҷикистон Давлат Сафарзода дар ҷаласаи ҳайати мушовараи вазорат, ки 13 октябр баргузор гардид, баён дошт.

Тавре АМИТ «Ховар» бо истинод ба Вазорати фарҳанги мамлакат  хабар медиҳад, дар ҷаласаи ҳайати мушовара Давлат Сафарзода зимни пешниҳоди ҳисобот зикр кард, ки «новобаста аз дастовардҳо  имрӯз дар фаъолияти муассисаҳои фарҳангии мамлакат проблемаҳои  зиёде ҷой дошта, вобаста ба ин мо бояд ҷиҳати ҳалли онҳо чораҷӯӣ намоем. Пеш аз ҳама,  бо мақсади самарабахш ба роҳ мондани фаъолияти вазорат, сардорони раёсат ва шуъбаҳоро зарур аст, ки барои сари вақт таҳия ва пешниҳод намудани гузоришҳои дар ҷаласаи ҳайати мушовара баррасишаванда ва ҳуҷҷатҳои назоратӣ бо масъулияти баланд муносибат намоянд».

— Айни замон  дар кори нарасидани мутахассисон дар соҳаи мусиқии касбӣ ва таъмини муассисаҳои консертӣ бо мутахассисони баландихтисос мушкилӣ ба назар мерасад. Масъалаи дигар- ин муҳтавои намоишҳои театрӣ мебошад, ки бояд аз ҷониби роҳбарият ва ҳайатҳои эҷодии муассисаҳои мазкур бобати пайдо намудани роҳҳои баланд бардоштани сатҳу сифати намоишҳо, ҷалби тамошобин ва ҷавобгӯ намудани муассисаҳо ба талаботи замон тадбирҳои амалӣ андешида шаванд,- изҳор дошт муовини Вазири фарҳанги ҷумҳурӣ.

Давлат Сафарзода афзуд, ки  «бо мақсади тақвияти фаъолияти театрҳои касбӣ ва муассисаҳои консертӣ ҳалли проблемаҳои зеринро дар мадди аввал мегузорам:  аз ҷиҳати бадеӣ ба талаботи замони муосир мувофиқ гардондани барномаҳо ва намоишҳо;  таҳкими базаи моддӣ-техникии театрҳо, гурӯҳҳо ва ансамблҳо; дарёфти асарҳои бадеию мусиқии баландғояи замонавӣ».

— Мутаассифона, дар самти таъминоти методӣ ва такмили заминаи меъёрии ҳуқуқӣ ва низоми идоранамоии фаъолияти иҷтимоӣ-фарҳангӣ то ҳол проблемаҳо вуҷуд дошта, мақомоти иҷроияи ҳокимияти давлатии вилоятҳо, шаҳру ноҳияҳо ҳангоми ташаккули буҷети маҳаллӣ эҳтиёҷоти воқеии муассисаҳои фарҳангиро ба инобат намегиранд. Маблағгузорӣ дар ин самт хеле нокифоя мебошад, -изҳори нигаронӣ кард Давлат Сафарзода.

Мавсуф хотиррасон намуд, ки ҷиҳати таҳия ва пешниҳоди тағйиру иловаҳо ба қонунгузории Ҷумҳурии Тоҷикистон оид ба пешгирии ҳолатҳои хусусигардонии иншооти фарҳангӣ, сертификатсиякунонии қитъаҳои замини тамоми муассиса ва иншооти фарҳангии ҷумҳурӣ то ҳол тадбирҳои самаранок андешида нашудаанд.

Муовини Вазири фарҳанг Давлат Сафарзода ҳамчунин иброз дошт, ки  «масъалаи навбатии ташвишовари дигари соҳа – рушд наёфтани фаъолияти театрҳои халқӣ ва ансамблҳои тарона ва рақси назди сохторҳои фарҳанг мебошад. Айни замон дар репертуари ансамблҳои оилавӣ ва театрҳои халқӣ муносибати эҷодкорона кам ба чашм расида, ҳайату репертуари онҳо ба талаботи замон мувофиқ нест. Бинобар ин раёсати дахлдорро зарур аст, ки ҷиҳати гузаронидани ислоҳот дар ин самт чораҷӯӣ намояд».

Номбурда иброз дошт, ки бо назардошти таҳкиму такмили раванд ва рушди муассисаҳои фарҳангӣ-фароғатӣ зарур мешуморам, ки барои ба низом даровардани вазъи муассисаҳои клубӣ дар доираи талаботи «Барномаи давлатии рушди муассисаҳои фарҳанги Ҷумҳурии Тоҷикистон барои солҳои 2021-2026» тадбирҳои зарурӣ андешида шаванд.

-Дар ин замина, ҷиҳати баланд бардоштани сатҳу сифати хизматрасонии фарҳангӣ, шаффофият ва дастрасии онҳо ба мардум, пешкаши саривақтию босифати чунин хизматрасониҳо, пешниҳоди лоиҳаҳои инвеститсионӣ баҳри таъмини тавсеаи самтҳои фаъолияти эҷодӣ нақшаҳо таҳия карда шаванд, — пешниҳод кард  ӯ.

-Бобати фаъолияти минбаъдаи муназзами муассисаҳои таълимии соҳаи фарҳанг ва санъат, ҷиҳати навсозии сохтори таълимот, омоданамоии кадрҳо, танзими бозгашти донишҷӯёне, ки тибқи роҳхати вазорат дар мактабҳои олии ҳунарии давлатҳои хориҷӣ таҳсилро ба анҷом мерасонанд, инчунин дигар самтҳое, ки ба фаъолияти илму таълим рабт доранд, низ бояд тадбир андешид,-илова кард Давлат Сафарзода.

«Дар пеш моро маъракаҳои муҳими фарҳангӣ интизоранд. Аз ин рӯ, муассисаҳои фарҳангиро мебояд дар татбиқи сиёсати фарҳангии Ҳукумати Ҷумҳурии Тоҷикистон фаъолона иштирок намоянд. Итминон дорам, ки аҳли фарҳанги мамлакат бо истифода аз иқтидори эҷодию амалӣ баҳри иҷрои босуботи ҳама нақшаву ният ва боло бурдани сатҳи маънавиёти ҷомеа тамоми донишу малака, ақлу идрок, кӯшишу ғайрат ва ҳунару истеъдоди хешро баҳри ташаккули ҷаҳони маънавии шаҳрвандон ва афзудани обрӯи Тоҷикистони соҳибистиқлол дар арсаи ҷаҳонӣ равона менамоянд”,- гуфт дар фарҷоми ҳисобот  муовини Вазири фарҳанги Ҷумҳурии Тоҷикистон Давлат Сафарзода.

Рухсораи НУР,
АМИТ «Ховар»