Президенти Ҷумҳурии Тоҷикистон Эмомалӣ Раҳмон бо Президенти Федератсияи Русия Владимир Путин суҳбати телефонӣ анҷом доданд
![](https://khovar.tj/wp-content/uploads/2020/07/Emomali-Rahmon-va-Vladimir-Putin-___.jpg)
ДУШАНБЕ, 07.10.2021 /АМИТ «Ховар»/. Имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон Эмомалӣ Раҳмон бо Президенти Федератсияи Русия Владимир Путин суҳбати телефонӣ анҷом доданд.
Дар ҷараёни суҳбати дӯстона Президент Роҳбари давлати Русияро бо зодрӯзаш сидқан табрик намуда, ба ӯ сиҳатмандӣ, некӯаҳволӣ ва комёбиҳои навро дар фаъолияти давлатиашон орзӯ намуданд.
Пешвои миллат фаъолияти пурмаҳсули муҳтарам Владимир Путинро дар маснади Президенти Федератсияи Русия ва саҳми шоёни ӯро дар рушди ҳамаҷонибаи муносибатҳои дӯстӣ ва шарикии стратегии Тоҷикистону Россия ба таври хоса таъкид карданд.
Пешвои миллат муҳтарам Владимир Путинро ҳамчунин ба муносибати баргузории бомуваффақияти чорабинии муҳими сиёсӣ – интихоботи Думаи давлатии Федератсияи Русия муборакбодӣ намуданд.
Дар рафти суҳбат президентҳо ба муколамаи худ атрофи ҷанбаҳои алоҳидаи ҳамкориҳои дуҷониба ва масоили мубрами таъмини амнияти минтақавӣ идома бахшида, ба раванди рушди вазъи Афғонистон дар вақти охир таваҷҷуҳи хосса зоҳир карданд.