Сафири Тоҷикистон бо Вазири неруи Эрон мулоқот намуд

ДУШАНБЕ, 18.10.2021 /АМИТ «Ховар»/. 16 октябр дар Теҳрон мулоқоти Сафири Ҷумҳурии Тоҷикистон Низомиддин Зоҳидӣ бо Вазири неруи Ҷумҳурии Исломии Эрон, Ҳамраиси Комиссияи муштараки ҳамкории тиҷоратӣ, иқтисодӣ, техникӣ ва фарҳангии Тоҷикистон ва Эрон Алиакбари Меҳробиён доир гардид. Дар ин бора АМИТ «Ховар» бо истинод ба Вазорати корҳои хориҷии Тоҷикистон хабар медиҳад.

 Дар мулоқот масъалаҳои таҳкими равобити дуҷониба, аз ҷумла пайгирии тавофуқоти зимни сафари расмии Президенти Ҷумҳурии Исломии Эрон Сайид Иброҳим Раисӣ ба Ҷумҳурии Тоҷикистон (17- 18 сентябри 2021) ҳосилшуда ва ҷараёни иҷрои бандҳои Протоколи ҷаласаи 14-уми Комиссияи муштараки ҳамкории тиҷоратӣ, иқтисодӣ, техникӣ ва фарҳангии Тоҷикистон ва Эрон (7-8 июни 2021, Душанбе) мавриди баррасӣ қарор гирифтанд.

Ҷонибҳо зарурати истифода аз имконот ва зарфияти мавҷударо барои рушди ҳамкории дуҷониба дар соҳаҳои гуногун таъкид карданд.

АКС аз ВКХ ҶТ