Бахшида ба Рӯзи Парчам ба зиёда аз 100 нафар поккорони шаҳри Хуҷанд кумак расонида шуд

ДУШАНБЕ, 19.11.2021 /АМИТ «Ховар»/. Субҳи имрӯз бахшида ба Рўзи  Парчами Ҷумҳурии Тоҷикистон аз ҷониби масъулин ва кормандони ZET-MOBILE  бо дастгирии мақомоти иҷроияи ҳокимияти давлатии вилояти Суғд ва  шаҳри Хуҷанд дар пайравӣ ба ташаббусу иқдомҳои башардўстонаю раъиятпарваронаи Пешвои миллат  муҳтарам Эмомалӣ Раҳмон  ба зиёда аз 100  нафар рўбандаю поккорони шаҳри Хуҷанд  кумакҳои моддӣ  расонида шуд, хабар медиҳад АМИТ «Ховар» бо истинод ба Хадамоти матбуоти Раиси вилояти Суғд.

Кормандони ZET-MOBILE  ҳангоми тақдими маводи ниёзи аввал, ки он  аз  орд, шакар, равған, биринҷ, макарон, марҷумак, чойи хушк ва дигар маҳсулоти  ғизоӣ иборат буд,  таъкид  намуданд, ки  заҳмати шабонарўзии ҳар як корманди ҷодаи ободонӣ  қадршиносӣ мегардад, зеро аз фаъолияти бомаром ва самаровари онҳо тозагӣ ва хуррамии маркази маъмурии вилояти Суғд –шаҳри Хуҷанд вобастагии зиёд дорад. Бахусус дар замони паҳншавии бемориҳои сироятӣ онҳо  дар ҷодаи ободонию тозагӣ масъулияти бештар ҳис намуда, корҳои назаррас анҷом доданд.

Акс аз Хадамоти матбуоти Раиси вилояти Суғд