Дар Афғонистон бар зидди толибон* ҷанги партизанӣ оғоз шуд

ДУШАНБЕ, 10.11.2021 /АМИТ «Ховар»/. Дар шарқи Афғонистон, дар музофоти Лағмон рақибони мусаллаҳи “Толибон”* ба муқобили ҳаракате, ки дар мамлакат ҳокимиятро ба дасти худ гирифтааст, ҷанги партизанӣ cap карданд. Дар ин бора хабаргузории «Интерфакс» бо такя ба изҳороти партизанҳо хабар медиҳад.

«Муҷоҳидин ва муборизони ҳуқуқ ва озодӣ дар вилояти Лағмон барои таъмини адолат дар кишвар ва хотима бахшидан ба истилоъ ба амалиёти партизанӣ ва ҷангҳо шурӯъ карданд”,- гуфта мешавад дар изҳорот.

Ҷанговарони зидди толибон зикр карданд, ки онҳо Ҷабҳаи миллии муқовиматро бо сардории Аҳмад Масъуд ҷонибдорӣ мекунанд.

Моҳи октябр раиси Ҳизби  кунгураи миллии Афғонистон Абдул Латиф Пидром, ки муқовиматро дастгирӣ менамояд, эълом дошт, ки неруҳои муқовимат дар Афғонистон ҷанги партизаниро алайҳи толибон* идома медиҳанд. Ба гуфтаи ӯ, неруҳои муқовимат водиҳои кӯҳӣ ва теппаҳои баланди  ду тарафи шоҳроҳи асосиро, ки аз дараи Панҷшер мегузаранд, дар ихтиёр доранд, вале худи гузаргоҳ таҳти назорати радикалҳо қарор дорад.

__________________________

* «Толибон» — ташкилоте, ки СММ мамнӯъ эълон кардааст

                                                                                                  АКС: bb.lv