Ғолибони Ҳафтаи илм, технология, инноватсия ва ихтироъкории наврасону ҷавонони шаҳри Душанбе ва беҳтарин сомонаҳои инноватсионӣ муайян шуданд

Ноябрь 22, 2021 15:55

ДУШАНБЕ, 22.11.2021. АМИТ «Ховар»/. Бо ташаббуси мақомоти иҷроияи ҳокимиятии давлатии шаҳри Душанбе дар  «Кохи Суруш»-и пойтахт маросими тантанавии ҳавасмандгардонии ғолибони Ҳафтаи  илм, технология, инноватсия ва ихтироъкории наврасону ҷавонони шаҳри Душанбе ва Озмуни шаҳрии беҳтарин сомонаҳои инноватсионӣ баргузор гардид. Дар он аз рӯи бахшҳои алоҳида ба лоиҳаҳои эҷодии 11 нафар «Шоҳҷоиза» супорида шуда, 170 нафар хонандагон бо диплому мукофотҳои мақомоти иҷроияи ҳокимияти давлатии шаҳри Душанбе қадрдонӣ шуданд. Инчунин дар озмуни шаҳрии беҳтарин сомонаҳои инноватсионӣ аз рӯи чор номина 11 иштирокчӣ  сазовори ҷойҳои ифтихорӣ гардиданд.

Бояд тазаккур дод, ки Ҳафтаи  илм, технология, инноватсия ва ихтироъкории наврасону ҷавонони шаҳри Душанбе  бо қарори Раиси шаҳри Душанбе Рустами Эмомалӣ аз 15 то 20 ноябр бахшида ба Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф  гузаронида шуда, мақсад аз он дарёфти истеъдодҳои ҷавон ва боло бурдани тафаккури техникии наврасону ҷавонон мебошад.

Зимни ифтитоҳи ҳамоиш муовини Раиси шаҳри Душанбе Мавсума Муинӣ иброз дошт, ки “ҳадафи асосии озмун баланд бардоштани сатҳу сифати таҳсил, ба эҷодкорӣ, навовариву ихтироъкорӣ,  омӯзиши амиқи илмҳои дақиқ, ташаккули сатҳи фарҳанги техникӣ, тарғиби маданияти истифодаи иттилооти интернетӣ, ҷорӣ намудани техникаю технологияи инноватсионии муосир дар раванди таълим ҷалб намудану сайқал додани донишу маҳорат ва дастгирии  ихтироъкорону навоварони наврасу ҷавон мебошад”.

Иттилоъ дода шуд, ки, дар рӯзи аввали ҳафта дарси маҳорат оид ба таҳия ва пешниҳоди корҳои илмӣ – эҷодӣ, барномасозӣ, моделсозӣ ва паркҳои технологӣ баргузор мегардад. Инчунин дар ин рӯз баргузории Шӯрои ҳамоҳангсозии фаъолияти ҷамъияти илмии хонандагони муассисаҳои таълимии шаҳри Душанбе дар назар дошта шудааст.

Дар ҳафтаи равон ҳамчунин баргузории Форуми наврасону ҷавонони шаҳри Душанбе оид ба технологияҳои иттилоотиву коммуникатсонӣ бо инобати муаррифии барномаҳои инноватсионии иштирокчиёни бахшҳои озмунии Ҳафтаи  илм, технология, инноватсия ва ихтироъкории наврасону ҷавонони шаҳри Душанбе, конференсияи илмӣ-эҷодии хонандагони муассисаҳои таълимии шаҳри Душанбе аз бахши фанҳои ҷамъиятӣ-гуманитарӣ, намоишгоҳи дастовардҳои инноватсиониву технологӣ ва ихтироъкории наврасону ҷавонони шаҳри Душанбе баргузор карда шуд.

Дар доираи ҳафтаи мазкур дар баробари хонандагону муаллимон инчунин олимону мутахассисон ва коршиносони соҳа низ фаъолона ширкат варзиданд.

Ҳамчунин дар ҷараёни барномаи мазкур муовини Раиси шаҳри Душанбе Фирдавс Саидзода зикр намуд, ки озмуни шаҳрии беҳтарин сомонаҳои инноватсионӣ бо мақсади рушди фарҳанги техникии аҳолӣ, мусоидат дар рушди иқтисодию иҷтимоии пойтахт тавассути истифодаи имкониятҳои технологияи иттилоотӣ – коммуникатсионӣ ва татбиқи сиёсати ҳукумати электронӣ дар фаолияти мақомоти иҷроияи ҳокимияти давлатии шаҳри Душанбе мебошад.

Дар озмуни макур шахсони ҳуқуқию воқеӣ, ки дар сохтани сомона-интернетсайтҳое, ки бо истифода аз дастоварду навовариҳои муосири технологияи иттилоотӣ – коммуникатсионӣ ҳисса гузоштаанд, ҳамзамон барои ҳалли масъалаҳои мубрами шаҳрдорӣ истифода бурда мешаванд, дар чор номина, аз ҷумла, беҳтарин сомонаи инноватсионӣ ва хизматрасониҳои давлатӣ, номинаи беҳтарин сомонаи инноватсионии иҷтимоӣ, беҳтарин сомонаи инноватсионии ҳамкории давлатию хусусӣ, беҳтарин сомонаи инноватсионии рушди соҳибкории ватанӣ иштирок намуданд.

Ҳамин тариқ, аз рӯи номинаи беҳтарин сомонаи инноватсионӣ –хизматрасониҳои давлатӣ ҷойи аввал ба сомонаи Академияи идоракунии давлатии назди Президенти Ҷумҳурии Тоҷикистон ва ҷойи дуюм ба сомонаи мақомоти иҷроияи ҳокимияти давлатии шаҳри Душанбе сазовор дониста шуд.

Инчунин дар номинаи беҳтарин сомонаи инноватсионии иҷтимоӣ ҷойи якум ба сомонаи Маркази миллии тестии назди Президенти Ҷумҳурии Тоҷикистон ва ҷойи дуюм ба сомонаи Радиои «Садои Душанбе» дода шуд.

Дар бахши беҳтарин сомонаи инноватсионии ҳамкории давлатӣ- хусусӣ ҷойи аввалро сомонаи рӯзномаи эектронии «eDonish» ва ҷойи дуюмро сомонаи «Довталаб» соҳиб шуданд.

Дар номинаи сомонаи инноватсионии рушди соҳибкории ватанӣ ҷойи якум ба сомонаи «Smart servise» ва ҷойи дуюм ба сомонаи ташкилоти амонатии қарзии хурди «Ҳумо» супорида шуд.

Зарангези ЛАТИФ,
Мақсудҷон МУҲИДДИНҶОН,
АМИТ «Ховар»

Ноябрь 22, 2021 15:55

Хабарҳои дигари ин бахш

Насли ҷавон бояд дар рӯҳияи ватандӯстиву ифтихори миллӣ тарбия ёбад,-бардошт аз мулоқоти роҳбарияти МИҲД Душанбе бо донишҷӯёни Коллеҷи ҷумҳуриявии тиббӣ
ХОНА-МУЗЕЙИ САДРИДДИН АЙНӢ КӮЧОНИДА НАМЕШАВАД. Шарҳи мақомоти иҷроияи ҳокимияти давлатии шаҳри Душанбе
Дар ноҳияи Фирдавсии пойтахт корхонаи истеҳсолии «АРЧА» ва гулгашти нав ба истифода дода шуд
БАРФИ АВВАЛ ДАР ДУШАНБЕ. Тамошои бориши он аз паси оина таскинбахш буда, ҳаловати тасвирношуданӣ дорад
63 нафар ғолибони даври шаҳрии Озмуни «Фурӯғи субҳи доноӣ китоб аст» ба даври ҷумҳуриявӣ роҳхат гирифтанд
«Эмомалӣ Раҳмон – Пешвои маҳбуби тоҷикон ва Президенти сулҳофар» — бардошт аз таҷлили Рӯзи Президент дар шаҳри Душанбе
Имрӯз Ҳафтаи илм, технология, инноватсия ва ихтироъкории наврасону ҷавонони шаҳри Душанбе оғоз мешавад
ХОНА-МУЗЕИ АЙНӢ БА ҶОИ МУНОСИБ КӮЧОНИДА МЕШАВАД. Шарҳи Мақомоти иҷроияи ҳокимияти давлатии шаҳри Душанбе
Бо қарори Раиси шаҳри Душанбе Рӯзи Президент дар пойтахт дар сатҳи баланди ташкилӣ таҷлил мешавад
Нархи роҳкирои воситаҳои нақлиёти мусофиркаш дар Душанбе баланд шуд
Ҳафтаи илм, технология, инноватсия ва ихтироъкории наврасону ҷавонони шаҳри Душанбе баргузор мегардад
Ба сокинони ноҳияи Синои шаҳри Душанбе китоби «Тоҷикон»-и аллома Бобочон Ғафуров тақдим мегардад