Шоираи Раҳимҷон дар ҷамъбасти Фестивали 5-уми адабии Авруосиёии Лиффт-2021 ҷоизаи «Занон барои сулҳ»-ро соҳиб шуд

ДУШАНБЕ,12.11.2021 /АМИТ «Ховар»/. Адиби тоҷик Шоираи Раҳимҷон дар Фестивали 5-уми адабии Авруосиёии Лиффт-2021, ки 11 ноябр дар шаҳри Истанбули Туркия оғоз шуда, то 14 идома меёбад, миёни 16 адиби дигари зан аз саросари ҷаҳон сазовори ҷоизаи «Занон барои сулҳ»  гардид, иттилоъ медиҳад хабарнигори АМИТ «Ховар» бо истинод ба саҳифаи фейсбукии Шоираи Раҳимҷон.

Тавре АМИТ «Ховар» қаблан иттилоъ дода буд, дар Фестивали 5-уми адабии Авруосиёии Лиффт-2021 се шоири тоҷик — ҳамраиси Ассамблеяи халқҳои Авруосиё Абдуқаҳҳори Қосим, шоирони  шинохта Хосият Вализода ва Шоираи Раҳимҷон миёни 500 нафар шоир аз 69 кишвар — Туркия, Озарбойҷон, Амрико, Русия, Белгия ва ғайра дар Истанбул иштирок доранд.

Бояд гуфт, ки Фестивали адабии Авруосиёии Лиффт ҳамасола аз ҷониби Ассамблеяи халқҳои Авруосиё баргузор мегардад. Ҳадафи он таҳкими эҷодкорӣ ва дӯстии нависандагон ва хонандагон дар Авруосиё ва эҷоди фазои ягонаи адабиёти Авруосиё мебошад. Ба ғолибони он ҷоизаҳои гуногун дода мешаванд.

АКС аз саҳифаи фейсбукии Шоираи Раҳимҷон