Хуршед Назаров бо камарбанди чемпионӣ аз Русия ба Ватан баргашт

ДУШАНБЕ, 28.12.2021 /АМИТ «Ховар»/.  Шоми дирӯз варзишгари  шинохтаи тоҷик Хуршед Назаров баъди дарёфти камарбанди чемпионӣ дар Лигаи АСА Young Eagles 23 ба Ватан баргашт. Дар Фурудгоҳи байналмилалии Душанбе парчамбардори кишварро ҳаводорони зиёди ин риштаи варзиш  гарму самимӣ истиқбол гирифтанд, хабар медиҳад мухбири  АМИТ «Ховар» Меҳрони Қурбон.

Ҳаводорони зиёди намудҳои муҳорибаҳои омехта дар Фурудгоҳи байналмилалии Душанбе ҷамъ омада, дастоварди варзишгари муваффақи тоҷик Хуршед Назаровро самимона истиқбол намуданд.

Ин варзишгари шинохтаи тоҷик чанде пеш дар рақобати ниҳоии мусобиқаи Лигаи АСА Young Eagles 23 бо намояндаи Ҷумҳурии Чеченистон Асвад Аҳмадов қувва санҷида, бо ҳисоби 5:4 дастболо шуд. Рақобати  варзишгарон шоми 25 декабр дар шаҳри Грозний баргузор гардид.

Хотиррасон мешавем, ки ин аввалин камарбанди чемпионии Хуршед Назаров дар Лигаи АСА Young Eagles ба шумор меравад. Ҳоло баъди ин пирӯзӣ шумораи ғалабаҳои варзишгари тоҷик ба 9 адад расид. Ӯ дар фаъолияти варзишиаш боре ҳам шикаст нахӯрдааст.

                                                                                                                       АКС аз манбаъҳои боз