Нишасти нуҳуми Форуми марказҳои таҳлилии Машварати ҳамкорӣ ва таҳкими боварӣ дар Осиё баргузор гардид

Декабрь 30, 2021 09:06

ДУШАНБЕ, 30.12.2021 /АМИТ «Ховар»/. 28 декабр бо ташаббуси донишкадаҳои Шанхай доир ба таҳқиқоти байналмилалии Ҷумҳурии Мардумии Чин нишасти нуҳуми Форуми марказҳои таҳлилии Машварати ҳамкорӣ ва таҳкими боварӣ дар Осиё (МҲТБО) таҳти унвони «Оғози нав барои барқарорсозии эътимоди мутақобила дар давраи пас аз пандемия: тамоюл ва ҳадафҳо» дар шакли маҷозӣ баргузор гардид, хабар доданд ба мухбири АМИТ «Ховар» аз Маркази тадқиқоти стратегии назди Президенти Ҷумҳурии Тоҷикистон.

Дар Форум намояндагони марказҳо ва муассисаҳои таҳлилии даҳ кишвари узви МҲТБО иштирок ва суханронӣ намуданд.

Дар ҳамоиш аз ҷониби ширкаткунандагон вазъ ва мушкилоти амниятӣ дар Авруосиё, ки таҳти таъсири пандемияи COVID-19 ба вуҷуд омаданд, мавриди баррасӣ  ва арзёбӣ қарор дода шуд. Иштирокчиён вазъияти мавҷударо мавриди таҳлилу арзёбӣ қарор дода, барои амалкардҳои муштарак ва таҳкими эътимод дар самти суботу амният мулоҳизаҳо баён намуданд.

Дар  бахши якуми форуми мазкур  таҳти унвони «Мушкилоти амниятии давлатҳои аъзои МҲТБО дар давраи пас аз пандемия» дар қатори роҳбарияти марказҳои зеҳнии дигар давлатҳо директори Маркази тадқиқоти стратегии назди Президенти Ҷумҳурии Тоҷикистон Хуршед Зиёӣ дар мавзӯи «Таҳдидҳои нави амниятӣ ба давлатҳои узви МҲТБО дар давраи постпандемия: дидгоҳ аз Тоҷикистон» маърӯза кард. Мавсуф зикр намуд, ки «барои мо хеле хурсандиовар аст, ки соли 2021 Маркази тадқиқоти стратегии назди Президенти Ҷумҳурии Тоҷикистон аз номи кишварамон ҳамчун узви комилҳуқуқи Форуми марказҳои таҳлилии МҲТБО ба кори ин форум ҳамроҳ шуд. Боварӣ дорем, ки нишасти навбатӣ ба фаъолияти форум такони нав бахшида, боиси рушди боз ҳам бештари табодули илмӣ ва академӣ байни марказҳои таҳлилии кишварҳои узв хоҳад шуд».

Дар идома Хуршед Зиёӣ тазаккур дод, ки алҳол хатари фаъолияти созмонҳои экстремистӣ ва террористии байналмилалӣ кам нашудааст. Гузашта аз ин, ҳаводиси ахири Афғонистон, ки боиси ба сари қудрат омадани ҷунбиши террористии «Толибон» дар ин кишвар гардид, аз он гувоҳӣ медиҳад, ки ин таҳдид аллакай дар сарҳади ҳавзаи МҲТБО қарор дорад. Бинобар ин, тамоми давлатҳои узви МҲТБО, хусусан сохтори амниятии тамоми кишварҳои узв  бояд вазъи нави амниятӣ дар Афғонистонро амиқ дарк намоянд ва дар ин самт тадбирҳои таъхирнопазири муштарак андешанд.

Иштирокчиёни ҳамоиши байналмилалӣ андешаҳои худро доир ба вазъи мавҷуда баён намуда, ҳамоҳангсозии амалу фаъолият, табодули иттилоот ва расонидани кумакҳои ҳамдигарӣ, мустаҳкам намудани ҳамкорӣ дар соҳаҳои сиёсию амниятӣ, иқтисодиёту тиҷорат ва дигар соҳаҳои муҳими иқтисодиёти миллии давлатҳои узви МҲТБО-ро  таъкид намуданд.

Ёдовар мешавем, ки Форуми марказҳои таҳлилии МҲТБО мақоми машваратӣ ва иттилоотӣ-таҳқиқотӣ буда, соли 2014 бо қарори кишварҳои узви МҲТБО бо мақсади дастгирии фаъолияти иттилоотӣ-таҳқиқотӣ ва рушди ҳамкорӣ миёни  марказҳои таҳқиқотӣ ва муассисаҳои илмӣ-пажӯҳишии давлатҳои аъзои МҲТБО таъсис дода шудааст.

АКС аз МТС

Декабрь 30, 2021 09:06

Хабарҳои дигари ин бахш

Намояндагони Бруней Доруссалом ба Конфронси дуюми байналмилалии Душанбе даъват шуданд
Нигоҳ аз Душанбе: Тоҷикистон ва Узбекистон наметавонанд аз ҳам ҷудо, бидуни дӯстиву ҳамкории мутақобила рушд кунанд
Сироҷиддин Муҳриддин дар вохӯрии панҷуми вазирони корҳои хориҷии кишварҳои Осиёи Марказӣ ва Русия иштирок намуд
Дар Боку намоишгоҳи аксҳо таҳти унвони «Тоҷикистон — кишвари қуллаҳои осмонбус ва дарёҳои тиллоӣ» ифтитоҳ ёфт
Тоҷикистон ва Ҷопон татбиқи лоиҳаҳои муштаракро дар соҳаҳои гуногун баррасӣ намуданд
Ҳайати Тоҷикистон дар машваратҳои сиёсии давлатҳои узви СҲШ дар Москва иштирок намуд
Пагоҳ мулоқоти вазирони корҳои хориҷии Русия ва панҷ кишвари Осиёи Марказӣ дар шакли видеоӣ доир мешавад
Дар Москва намоиши аксҳо бахшида ба 30-солагии барқарории муносиботи дипломатӣ миёни Русия ва дигар давлатҳои ИДМ ифтитоҳ ёфт
Шараф Шерализода бо муовини парлумонии Вазири корҳои хориҷии Япония мулоқот намуд
Тоҷикистон ва Япония баргузории ҳамоишҳои соҳибкорон ва амалисозии лоиҳаҳои сармоягузориро баррасӣ карданд
«АЗ ДУШАНБЕ ТО СЕУЛ». Ба шарафи 30-солагии барқарории муносибатҳои дипломатӣ миёни Тоҷикистон ва Корея ҳамоиши фарҳангӣ доир мегардад
Форумҳои сармоягузорию тиҷоратии Тоҷикистон ва Туркия давоми соли равон баргузор карда мешаванд