ДУШАНБЕ, 28.12.2021 /АМИТ «Ховар»/. Русия ба сохтмони посгоҳи муосири марзӣ дар Тоҷикистон дар сарҳад бо Афғонистон шурӯъ мекунад. Тавре АМИТ «Ховар» хабар медиҳад, дар ин бора дирӯз, 27 декабр зимни нишасти матбуотӣ дар Душанбе Сафири Русия дар Тоҷикистон Игор Лякин-Фролов дар посух ба суоли мухбири ТАСС иттилоъ дод.

«Масъалаҳо [амният] ҳам дар заминаи дуҷониба ва ҳам бисёрҷониба баррасӣ шуданд, аз ҷумла дар чаҳорчӯби Созмони Аҳдномаи  амнияти дастҷамъӣ қарор дар бораи таҳкими марзи Тоҷикистон ва Афғонистон қабул шуд <…> Саҳми дигари Русия бунёди постгоҳи марзӣ дар ноҳияи Шамсиддини Шоҳин аст (дар вилояти Хатлони Тоҷикистон дар марз бо Афғонистон – тавзеҳи ТАСС), маблағҳо ҷудо карда шуданд, созишнома ба имзо расид, ин лоиҳа ба марҳилаи амалӣ ворид шуда, посгоҳи муосири сарҳадӣ бунёд карда мешавад», — гуфт дипломати рус.

Ӯ ҳамчунин зикр намуд, ки дар доираи ин тасмимҳо ҷониби Русия интиқоли аслиҳаҳоро барои Қувваҳои мусаллаҳи Тоҷикистон анҷом додааст.

Ба гуфтаи ӯ, «дар пойгоҳи низомии 201-уми Русия, ки дар Тоҷикистон ҷойгир шудааст, муосиркунонӣ фаъолона ҷараён дошта, он бо таҷҳизоти замонавӣ муҷаҳҳаз аст, инчунин як қатор машқҳо, усулҳо гузаронида шуда, давоми сол ҳудуди 40 тамрин гузаронида мешавад. Ӯ изҳор дошт, ки пойгоҳи Русия бо шарикони тоҷик ва бисёрҷониба — дар чаҳорчӯби СААД — бо ширкати кишварҳои дигар машқҳои дуҷониба анҷом медиҳад ва ин тамринҳоро сатҳи баланди омодагӣ унвон кард. «Ба ин масъала (таъмини амният дар сарҳади Тоҷикистону Афғонистон – тавзеҳи ТАСС) таваҷҷуҳи бештар зоҳир хоҳад шуд», — хулоса кард сафир.