Толибилмони Литсей барои хонандагони болаёқат дар шаҳри Хуҷанд соҳиби грант барои омӯзиш гардиданд

Декабрь 28, 2021 08:18

ДУШАНБЕ, 27.12.2021 /АМИТ «Ховар»/. Се толибилми Литсей барои хонандагони болаёқат дар шаҳри Хуҷанд Алиҷон Усмонов, Абӯбакр Комилов ва Аслан Насратшоев хонандагони синфи 10-уми Муассисаи мазкур, ки дар олимпиадаи сатҳи ҷаҳонии «MATH-CHALLENGE 2021» дар кишвари Таиланд аз фанни математика бо забони англисӣ иштирок намуда, ғолиб омада буданд, соҳиби шоҳҷоизаи озмун — гранти омӯзишӣ дар Донишгоҳи Амрикои Шимолӣ шуданд. Дар ин бора корманди Хадамоти матбуоти Раиси вилояти Суғд Андар Раҳмонӣ ба АМИТ «Ховар» иттилоъ дод.

Директори Литсейи мазкур Сурайё Негматова афзуд, ки гранти омӯзишии мазкур дар умум 220 ҳазор доллари амрикоиро ташкил дода, 80 ҳазор доллари он ба Алиҷон Усмонов, 80 ҳазор доллар ба Абӯбакр Комилов, 60 ҳазор доллар ба Аслан Насратшоев ихтисос дода шудааст. Дарёфти гранти омӯзишӣ имкон медиҳад, ки ин се хонандаи литсей тӯли 4 сол ройгон дар Донишгоҳи Амрикои Шимолӣ (North American University) таҳсил намуда, ҳамчунин бо хобгоҳ ва хӯроки ройгон таъмин карда шаванд.

Гранти мазкур танҳо барои омӯзиш буда, ҳаққи ба касе туҳфа кардан, нақд гирифтани пул вуҷуд надорад. Маблағи солонаи таҳсил (бе хобгоҳ ва хӯрок) дар Донишгоҳи Амрикои Шимолӣ барои хориҷиён 12700 доллари амрикоиро ташкил дода, гранти ба даст овардаи литсей танҳо барои омӯзиши ин се хонанда, сарф карда мешавад.

Ҳамчунин тибқи сертификат ва номаи расмии Донишгоҳи Амрикоӣ Шимолӣ гранти мазкур то 3 сол эътибор дошта, дар муҳлати зикршуда хонандагони литсей баъди хатми муассиса бо пешниҳоди сертификат ва номаи расмии литсей омӯзишашонро дар шаҳри Стаффорди штати Техас дар Донишгоҳи Амрикои Шимолӣ идома медиҳанд. Ин нахустин бор аст, ки хонандагони ин боргоҳи таълимӣ соҳиби чунин гранти бонуфузи кишвари Амрико гардиданд.

Лозим ба таъкид аст, ки гранти мазкур ҳамасола аз рӯи натиҷаи бадастовардаи хонандагон дар олимпиадаи сатҳи ҷаҳонӣ дода шуда, имсол беш аз 5 ҳазор нафар довталаб барои грантӣ омӯзишӣ буданд. Қобили зикр аст, ки Донишгоҳи Амрикои Шимолӣ аз пурнуфузтарин донишгоҳи Амрико ба ҳисоб рафта, ба 10 гонаи беҳтарин донишгоҳҳои Штатҳои Муттаҳидаи Амрико шомил аст.

Ёдовар бояд шуд, ки дар Литсей барои хонандагони болаёқат дар шаҳри Хуҷанд кор бо хонандагони боистеъдод ва гуруҳи олимпӣ ҷиддӣ ба роҳ монда шудааст. Дар ҳаракати олимпии литсей 180 хонандаи болаёқат шомил буда, ҳамасола хонандагон дар 15 олимпиадаи сатҳи ҷаҳонӣ аз фанҳои дақиқ ва забономӯзӣ иштирок менамояд.

Танҳо дар 4 моҳи соли таҳсили 2021-2022 хонандагони болаёқати Литсей дар 8 Олимпиадаи сатҳи ҷаҳонӣ аз фанҳои дақиқ ва забономӯзӣ, аз ҷумла «BRICSMATH», «PHIZTECH», «MATH-CHALLЕNGE», «UNICEP-JUNIOR», «FISO», «ANTALYA» дар кишварҳои Таиланд, Туркия, Англия, Амрико, Русия, Бразилия иштирок намуда, дар умум 138 ҷойҳои ифтихорӣ 76 медали тилло, 33 медали нуқра ва 29 медали биринҷӣ ба даст оварда, боз ҷиҳати иштирок дар 7 Олимпиадаи ҷаҳонӣ омодагӣ дида истодаанд.

Омӯзиши фанҳои дақиқ аз ҷумла физика, химия, биология, география, математика дар муассисаи мазкур бо забони англисӣ ба роҳ монда шудааст ва ин амр имкон медиҳад хонандагони болаёқат ҳамасола дар олимпиадаҳои сатҳи ҷаҳонӣ бо забони англисӣ иштирок намуда, шарафи кишварро дар сатҳи ҷаҳонӣ ҳимоя намоянд.

АКС: Хадамоти матбуоти Раиси в. Суғд

Декабрь 28, 2021 08:18

Хабарҳои дигари ин бахш

ОБУ ҲАВО: Имрӯз дар ноҳияҳои алоҳидаи Тоҷикистон борони кӯтоҳмуддат меборад
ОБУ ҲАВО: Имрӯз дар Тоҷикистон ҳавои камабри бебориш дар назар аст
Дар Тоҷикистон хатари зуҳуроти сел то охири ҳафта боқӣ мемонад
Дар Лахш оид ба тарбияи ҳарбӣ-ватандӯстӣ, тарғиби фарҳанги миллӣ ва пешгирии майли бегонапарастӣ ҳамоиш доир шуд
ОБУ ҲАВО: Имрӯз дар Тоҷикистон ҳавои тағйирёбандаи бебориш дар назар аст
ОБУ ҲАВО: Шабонарӯзи наздик дар минтақаҳои алоҳидаи кӯҳии Тоҷикистон сар задани зуҳуроти селӣ дар назар аст
ОБУ ҲАВО: Имрӯз дар Тоҷикистон борони бошиддат меборад
Дар шаҳри Ваҳдат 208 килограмм маҳсулоти хӯроквории ғайристандартӣ нобуд карда шуд
ОБУ ҲАВО: Имрӯз дар ноҳияҳои алоҳидаи Тоҷикистон борони кӯтоҳмуддат меборад
Риояи қоидаҳои ҳаракат дар роҳ- кафили бехатарии кӯдакону наврасон
Дар соҳилҳои Сирдарё ва «Баҳри Тоҷик» амалиёти назоратӣ гузаронида шуд
Дар Ҷамоати деҳоти Понғози ноҳияи Ашт муассисаи таълимии №7 ба истифода дода шуд