Дар Афғонистон ва Чин заминларзаҳои сахт ба амал омаданд

ДУШАНБЕ, 24.01.2022 /АМИТ «Ховар»/. Имрӯз, 24 январ дар қисмати шимолу шарқи Афғонистон заминларза бо шиддати 5,3 дараҷа ба қайд гирифта шуд. Дар ин бора АМИТ «Ховар» бо такя ба Маркази зилзиласанҷии Аврупову Баҳри Миёназамин хабар медиҳад.

Ба иттилои манбаъ, маркази зилзила дар километри 49-уми самти  шарқии шаҳри Бағлон, ки дар он ҳудуди 108 ҳазор нафар зиндагӣ мекунанд, воқеъ будааст. Маркази офати табиӣ дар умқи 10 километр ҷойгир будааст.

Дар бораи хисорот ва талафоти эҳтимолӣ гузориш нарасидааст.

Як рӯз қабл дар қаламрави музофоти Тсинхай, воқеъ дар шимолу ғарби Ҷумҳурии Мардумии Чин бо шиддати 5,8 дараҷа заминларза ба қайд гирифта шуд, хабар медиҳад АМИТ «Ховар» бо истинод ба иттилоияи Маркази зилзиласанҷии Чин.

Таконҳои зеризаминӣ дар мавзеи минтақаи шаҳрии Дэлинхаи ҳавзаи мухтори  Ҳайси-Муғулистон-Тибет ба амал омаданд. Маркази заминларза дар умқи 8 километр ҷойгир будааст.

Дар бораи зарардидагон ва харобиҳо дар ҳавзаи мухтори  Ҳайси-Муғулистону Тибет, ки аҳолии он аз 460 ҳазор нафар зиёд аст, маълумот нест.

Доир ба талафот ва хисороти молӣ низ гузориш нарасидааст.

                                       АКС РИА Новости